Uphelele emlilweni kusha umjondolo
USHE wangqongqa owesifazane obenezinsukwana eqale ukuhlala emjondolo eClairwood ngoba ebalekele ukubiza kwefulethi abehlala kulo.
Lo wesifazane okusavele ukuthi igama lakhe nguHlengiwe (isibongo esingatholakalanga) waseFlagstaff, uqale ukuhlala eminjondolo edume ngeLa Lucia, ngoLwesine, kwabe sekusha ngoMgqibelo ekuseni.
Umufi kuthiwa ufike ngezintatha ngawo uMgqibelo emuva kokuzijabulisa kwenye indawo yokucima ukoma.
Omakhelwane bakhe basola ukuthi akawuzwanga umlilo, noma sebebaleka abanye abantu umsindo wangawuzwa.
Utholwe ngabahlala kule ndawo sebezama ukubuyisela imijondolo yabo. Akekho obazi ukuthi wayesendlini kusha.
UNksz Thulisile Mlaba obeqashise umufi endlini yakhe uthe ubengakayikhokhi ngisho imali yokuhlala ngoba ubenezinsukwana efikile.
“Sasivumelene ngokuthi uzokhokha uR300 ngoba kukhona yonke impahla. Bekumele aqale ukukhokha ngoJuni 5. Ngiphatheke kabuhlungu kakhulu ngokushona kwakhe. Kunzima ngisho ukuwakha kabusha umjondolo emuva kwalesi sigameko,” kusho uNksz Mlaba naye ohlala kweminye imijondolo khona eClairwood.
Elandisa Isolezwe uthe umufi ubazi ukuthi ubehlala efulethini nabanye besifazane, bebathathu bekhokha uR400 umuntu ngamunye.
Uthe wamtshela ukuthi ufuna indawo ebiza kancane azokwazi ukuhlala kuyona yedwa ngoba esekhathele ukuhlala nabantu.
Isolezwe ngesikhathi liye kule ndawo usizi belubhalwe ebusweni njengoba abantu besale nezimpahla abazigqokile bashelwa yikho konke.
Izingane nazo bezibonakala zizulazula zingazi nokuthi zizodlala kuphi.
Yize umlilo ungaziwa ukuthi uqale kanjani kodwa kunezinsolo zokuthi kunowesilisa oxabane neyengandoda elihlala kule ndawo emuva kokuba limqolile, wathembisa ukushisa imijondolo ukuze aziphindiselele.
Kusolwa ukuthi izindlu okuqale kuzo umlilo zibhunyelwe ngo-phethroli, zokhelwa ngomlilo.
UMnuz Siphiwe Vundle (32) wase-Eastern Cape uthe useneminyaka engaphezu kweyisishiyagalombili ehlala kule ndawo.
“Ngishelwe yiyo yonke into ngisho nomazisi wami. Ngiphume nebengikugqokile ngoba umlilo ubusha kakhulu, kunomoya omkhulu. Ngisho nokudla ebengikuthengile kushe konke,” kusho uVundle.
UNksz Ntombenhle Shangase (30) waseMzinyathi oneminyaka eyisithupha ehlala kule ndawo uthe ubekubo ngesikhathi kusha.
“Ngifike kushe yonke into, kushe umbhede, ifriji, ukudla nezimpahla zami. Angazi ngizozithathaphi ngoba angisebenzi. Siyaludinga usizo ukuze sizokwazi ukuba nendawo yokulala nokudla,” kusho uNksz Shangase.
Okhulumela amaphoyisa KwaZuluNatal uCaptain Nqobile Gwala uthe bavule idokodo ngokushona komuntu. Uthe basaphenya, nomndeni kamufi uyathungathwa.