‘Sizozikhokha izindleko zecala likaZuma’
ABANGANI abangosomabhizinisi balowo obengumengameli wakuleli uMnuz Jacob Zuma bathi bazozikhokhela izindleko zecala lakhe uma kuwukuthi akanayo imali.
Lokhu kulandela ukuvela kwezindaba zokuthi uZuma angase angabi nayo imali yokukhokhela izindleko zecala lakhe lenkohlakalo eliqhubeka eNkantolo eNkulu yaseThekwini.
Phakathi kwezinhlangano zosomabhizinisi eseziphumele obala zathi zizolekelela ngemali uma kunesidingo kukhona nenhlangano yabangcwabi iNational Funeral Practitioners Association of South Africa (Nafupa SA).
INafupa SA ngenye yezinhlangano ebezilokhu zeseka uZuma kusukela kuvuswe kabusha amacala akhe enkohlakalo athinta udaba lokuthengwa kwezikhali.
UZuma ngoLwesihlanu kulindeleke ukuthi avele okwesibili eNkantolo eNkulu yaseThekwini mayelana namacala enkohlakalo.
“Sizokwenza noma yini esemandleni ethu ukuthi silekelele uma sithola ukuthi ubaba uZuma unezinkinga zemali ngoba siyamthanda,” kusho uMnuz Nkosentsha Shezi weNafupa SA.
Uthe okwamanje uZuma ubengakabathinti ebacela ukuthi abalekelele.
UMengameli uMnuz Cyril Ramaphosa ekuqaleni kwalo nyaka uthembise ukuthi uMbuso uzozikhokhela izindleko zecala likaZuma njengoba icala lenzeka ngesikhathi esasebenzela uhulumeni.
NgoMashi iDA iye enkantolo iyophoqa ukuthi uZuma akhokhele uMbuso uR15.3 million obususebenzile kukhokhelwa icala lakhe.
Ngesikhathi uZuma evela enkantolo ngo-Ephreli izinkulungwane zamalungu e-ANC zaphuma ngobuningi bazo zizomeseka zigqoke izikibha zenhlangano okwakushaywe umyalelo wokuthi zingagqokwa.
UShezi ungomunye wababenxenxa abalandeli ukuzokweseka uZuma uthe babengeke bakwazi ukunqanda abantu ukuthi bangazigqoki izikibha zenhlangano.
“Abantu baKwaZulu-Natal bayayithanda inhlangano futhi bayamthanda uZuma,” kusho uShezi.
Uthe ngoLwesine kuzoba nomlindelo ozoqala ngehora lesithupha ntambama uze uphele ngehora lesithupha ngoLwesihlanu ekuseni kuphinde kube nemashi ezosuka kuBotha iphele enkantolo.