Uzobuya ekhulelwe umethuli we-Our Perfect Wedding

UKHUZA ibuya umethuli wohlelo i-Our Perfect Wedding uKayise Ngqula othuse abaningi ehlaba ikhefu esanda kuqashwa.

Ubuya nje, sekuvele izindaba zokuthi uzithwele.

UKayise owaqala ukubonakala kulolu hlelo kulo nyaka, ubhale enkundleni yokuxhumana u-Instagram eveza injabulo yakhe ngokuqala aqophe futhi.

Muva nje lolu hlelo belubanjwe nguNomsa Buthelezi, onogazi kwabaningi njengoba ehlala ebamba uma kukhona ongekho kulona.

UKayise uthe uyabuya futhi usekulindele ngabomvu ukwenza into ayithandayo.

“Ngibuyela nina. Umuntu kumele enze into ayithandayo ngaso sonke isikhathi ukuze ajabule,” kubhala uKayise.

NoNomsa ubhalile kuyona inkundla efanayo la eveze khona ukuthi ube nesikhathi esimnandi eqopha lolu hlelo.

“Njengoba sekusondela isikhathi sokuthi kubonakale isiqephu sokugcina sami kulolu hlelo ngithanda ukubonga wonke umuntu nozakwethu engihlala ngehla ngenyuka nabo siqopha,” kubhala uNomsa.

Iningi likhale ngokuthi ngabe uNomsa usehlala unomphela kulolu hlelo abe ngumethuli walo.

UBongiwe Potelwa-Metsing, okhulumela iMzansi Magic ukuqinisekisile ukuthi uKayise uyabuya ngoJulayi.

“Uyabuya uKayise njengoba eseqalile ukuqopha iziqephu zakhe ezintsha kulolu hlelo,” kusho uBongiwe.

Ebuzwa ukuthi ngabe uKayise usebelethile yini njengoba esebuya uthe, uqopha khona ekhulelwe.

“Usekude ukubeletha ngakho usazoqhubeka asebenze,” kusho uBongiwe.

Isithombe: SIGCINIWE Isithombe: INSTAGRAM UZOLWETHULA ekhulelwe uhlelo i-OPW uKayise Ngqula obesanyamalele isikhashana kulo nozobuya ngoJulayi AKUCACI ngekusasa likaSello Maake kaNcube kwiThe Wathathwa enoConnie Ferguson ongumphathi womdlalo