Kweqe osolwa ngokubulala
UHLALELE ovalweni umphakathi waKwaNongoma esigodini kwaLubomvu, kwaDabhasi ngemuva kokweqa esibhedlela KwaCeza, kowesilisa obeboshelwe icala lokudlwengula, ukuthumba nokubulala umfundi kaGrade 11 kule ndawo.
UThuleleni Zwane (18), obengumfundi eNkowane High, watholwa elenga esihlahleni ngoLwesine olwedlule ngemuva kokuthi umsolwa efike ngoLwesithathu ebusuku kubo wazomthatha wanyamalala naye.
Kuthe uma umndeni uhlaba umkhosi ngalolu daba kwatholakala isidumbu sikaNksz Zwane silenga esihlahleni futhi kunezinkomba zokuthi udlwenguliwe. Ilungu lomphakathi, uMnuz Welcome Ntombela ebeliyingxenye yezakhamizi ezigasele esiteshini samaphoyisa KwaNongoma, ngemuva kokweqa kukamsolwa lithe bayesaba manje ukuthi yini angayenza njengoba kungaziwa ukuthi weqe washonaphi. “Kubuhlungu ngale nto esehlele ngoba lo mlisa akulona icala lakhe lokuqala leli kodwa kukhona namanye amantombazane amane, enye yawo eneminyaka engu-14. Okubi wukuthi nale ngane yakwaZwane athinteka esigamekweni sayo, ayikangcwatshwa kodwa bekusahlelwa ukuba ifihwe ngoMgqibelo lona esiya kuwo. Ngikhuluma nje umndeni nomphakathi bebelindele ukuba lo muntu avele enkantolo ngoMsombuluko odlule. Kunalokho kuthunyelwe incwadi kadokotela ebithi akasezi enkantolo kodwa usesibhedlela KwaCeza ngoba uyagula. Kusenjalo sezwa sekuthiwa weqile esibhedlela ntambama ngehora lesikhombisa ngawo uMsombuluko,” kusho uNtombela.
Ngisho izinduna zithukuthele ziyaveva njengoba nazo kuthiwa ziphelezele umphakathi nomndeni ziyobuza ngokweqa komsolwa.
Ikhansela lendawo ku-ward 10, uMnuz Jacob Nsele lithe isimo asisihle ngoba umphakathi wonke uthukile ngokunyamalala komlisa.
“Wonke umuntu uyesaba ngoba lo msolwa uyingozi kakhulu. Ngikhuluma nje ngisho amaphoyisa agcine esecela abanye asebadlwengulile ukuba bavuselele amacala abo, ngesikhathi umphakathi ugasele esiteshini. Thina singubuholi kusiphatha kabi ukuthi uma siqala inyanga yentsha bese kuba nezigameko ezibuhlungu kanje. Okunye okubi wukuthi lo mndeni oshonelwe awunalutho yikho sizolekelela,” kusho uNsele.
Uthe inkonzo yesikhumbuzo izoba namhlanje eNzobo Primary bese umngcwabo uba ngoMgqibelo kwaZwane. UNsele uthe bazoqala umkhankaso endaweni wokuqwashisa ngobugebengu nangezigameko zokuhlukunyezwa kwabesifazane nezingane.
Izolo, amalungu omndeni abengekho ekhaya ngesikhathi Isolezwe lifika, abephuthume eMpangeni lapho isidumbu siyohlolwa khona.
Amaphoyisa aKwaNongoma atshele umphakathi ukuthi anenkinga yokuthi awanazo izindawo zokugcina iziboshwa.
Iziboshwa aziyisa KwaHlabisa noma KwaCeza. Okhulumela amaphoyisa KwaZulu Natal, uLt Colonel Thulani Zwane uthe amaphoyisa asephume inqina athungatha umsolwa. Uthe abambonayo bathinte amaphoyisa ku 08600 10111.