Baphawule kolobumbano lwe-ANC eKZN
ABAHLAZIYI bezepolitiki bathi luselude ukhalo okusamele luhanjwe yi-ANC KwaZulu-Natal odabeni lobumbano kule nhlangano.
Bakusho lokhu nje kusasa kuqala ingqungquthela ebibhekwe ngabomvu yokukhetha ubuholi selokhu kwahlakazwa obesifundazwe ngemuva kokuba ababenganeme ngemiphumela yengqungquthela yango-2015 baya enkantolo befuna ithathwe njengento engekho. Umhlaziyi ozinze eNyuvesi yaKwaZulu-Natal, uMnuz Lukhona Mnguni, uthe lude ukhalo olusazohanjwa ngendaba yobumbano. Uthe ingqungquthela eyamagatsha ngakho noma kuthiwa kunezifunda ezingakahlali kumele iqhubeke uma u-70% wamagatsha usukulungele ukuya engqungqutheleni.
“Singabona kuphuma ubuholi bezinhlangothi ezimbili ukuze kuzanywe eyobumbano. Ibibhekwe ngabomvu le ngqungquthela ikakhulu njengoba kuzoba nokhetho ngonyaka ozayo kudingeka kuyiwe okhethweni ingekho inhlakanhlaka.”
Uthe kuzobe sekulungiselelwa nengqungquthela yokukhetha ubuholi bukazwelonke ezoba ngo-2023.
UMnuz Thabani Khumalo, umhlaziyi uthe ubona ingqungquthela izozama ukulandela uhlelo lwengqungquthela yangoDisemba yaseNasrec yokukhetha abaholi abavela ezinhlangothini ezimbili.
Uthe nakuba kunjalo kodwa mkhulu umsebenzi ozobe uhlalele abazokhethwa odabeni lokubumba inhlangano.
“Ithimba elakhethwa ngemuva kokuhlakazwa kobuholi besifundazwe lahluleka lancama ukubumba isifundazwe. Singabona iba khona imizamo yobumbano njengokuthi kukhethwe ubuholi bezinhlangothi ezimbili ezibangayo ukuze kwakheke leso sithombe sokuthi babumbene,” kusho uKhumalo.
Uthe kwakumele kwasekuqaleni kuhlakazwe ubuholi besifundazwe bese kulethwa umuntu osuka kuzwelonke ukuze engamele isifundazwe.
Kuzoshona elangeSonto esaziwa umholi wesifundazwe kule ngqungquthela esenyuvesi yaseZululand, oNgoye. THUMELA umbono ngalolu daba kuFacebook (Isolezwe), kuTwitter (@isolezwenews) noma umqhafazo ku-45773. I-sms ibiza R1,50.