UKaunda umise amatekisi aseMnambithi futhi
APHINDE amiswa ezinye izinyanga eziyisithupha amatekisi aseMnambithi ahamba amabanga amade ngenxa yodlame lwamatekisi.
Izolo uNgqongqoshe wezokuThutha KwaZuluNatal, uMnuz Mxolisi Kaunda (osesithombeni), esitatimendeni asithumele abezindaba uthe kuzoma ezinye izinyanga eziyisithupha ukuhamba kwamatekisi aseMnambithi ngoba abaxolelani ososeshini ababili abathintekayo – iKlip River neSizwe Transport.
UKaunda usebenzise isigaba sika-91 kumthetho wezokuthutha (National Land transport Act) kuSection No. 5 ka-2009 ukwenza lokhu.
UKaunda wayevele ewamisile amatekisi ngoDisemba 7, 2017 emuva kokubulawa kwabantu abawu-11 okwakukhona kubo nothisha ababeya esikoleni ngesikhathi kudutshulwa usomatekisi weKlip River. Namhlanje ukumiswa kwamatekisi okwenzeka ngoDisemba bekuzophelelwa yisikhathi kodwa sesiphinde selulwa isikhathi sokumiswa kwawo. “Umnyango usavuliwe ukuba labo soseshini beze kithina neqhinga lokuthi bazothelelana amanzi kanjani bese besebenzisana ngokuthula. Uma isivumelwano sokuthula singenzeki ngiyaphoqeleka ukuthi ngithathe izinqumo ezinqala okubalwa ngisho ukubaphuca imvume yokusebenza imizila kulabo abaphehla udweshu,” kusho uKaunda.
Kusukela kwamiswa ukusebenza kamatekisi eMnambithi ngoDisemba, akekho noyedwa umuntu oseke wahlaselwa kule mizila ngenxa yombango wamatekisi.
“Siwuhulumeni sizoqhubeka ukuqinisa ezokuphepha embonini yamatekisi ukuze siqinisekise ukuthi akekho umuntu obulawayo ngenxa yombango ematekisini. Sitshale namaphoyisa azoqapha isimo ukuthi le mizila esiyivalile ayisebenzi,” kusho uKaunda.
Imenenja kwiSantaco, uMnuz Sfiso Shangase, uthe: “Okwamanje kunzima ukuba ngiphawule ngoba ebesibathumile bebengakabuyi nezimpendulo ngokwenzekile. Uma kunesizathu sokuba aqhubeke abamise ezinye izinyanga eziyisithupha sizokwamukela njengoba sakwamukela nasekuqaleni ukumiswa kwamatekisi,” kusho uShangase.
Amatekisi ahambela ngaphakathi eMnambithi wona ayaqhubeka ukusebenza.