Isiteleka senyunyana yabasebenzi bakahulumeni
KUNGASE kuphazamiseke ukuhlinzekwa kwezidingo emphakathini njengoba inyunyana yabasebenzi bakahulumeni iPublic Servants Association of South Africa (PSA) ithe izoteleka ngelizayo ifuna ukunyuselwa amaholo ngo-12% ekubeni uhulumeni ewanyusa ngo-7%.
Le nyunyana isezinyunyaneni ezingakasisayini isivumelwano sokunyuswa kwamaholo eminyakeni emithathu ezayo.
Ezinye zezidingo ezizophazamiseka ngenxa yesiteleka ukuhlinzekwa kwamanzi njengoba kuzoteleka abasebenza emanzini, emingceleni yakuleli, izinkantolo neminye imikhakha. Abasebenzi bezempilo bona ngeke babe yingxenye njengoba bengavunyelwe ukuteleka.
IPhini likaNobhala jikelele kule nyunyana, uMnuz Tahir Maepa, lithe bawunika umnyango wezisebenzi zikahulumeni nokuphatha isexwayiso sokuthi amalungu abo angu-242 000 azoteleka kusukela ngoMsombuluko.
Uthe akulona iqiniso ukuthi isiteleka sabo sizobe singekho emthethweni.
“Ngeke samukele imali encane kangaka. Asikwazi ukuthatha into ephansi ngale ndlela uma uqhathanisa neminye iminyaka. Asifuni ukuzivala thaqa izibhedlela neziteshi zamaphoyisa ngoba yimikhakha ethathwa njengengafanele iteleke kodwa sifuna ukuphazamisa.”
UMaepa uthe owayengumengameli wezwe, uMnuz Jacob Zuma, kumele angatatazeli ngoba akekho ozobe emshushisa ngoba kuzobe kungasetshenzwa ezinkantolo.
UZuma ubuyela kusasa enkantolo ebhekene namacala enkohlakalo ngendaba yokuthengwa kwezikhali.
“Uma sesisesitelekeni uZuma kumele akhululeke ngoba ngeke ashushiswe. Akukho muntu ozobe esenkantolo.”
Uthe bazovala yonke imingcele engenela kuleli wathi bazovala nomnyango wezamanzi.
Uqhube wathi sizoshaya umnotho lesi siteleka wathi izwe lizolahlekelwa yisigidi ngosuku uma ngukuthi kushaya uMsombuluko uNgqongqoshe woMnyango weziSebenzi zikaHulumeni, uNksz Ayanda Dlodlo, akezi nento engcono etafuleni.
Likhuluma oKhozini FM izolo ibamba likamqondisi jikelele kulo mnyango, uNksz Thuli Hadebe, lithe izinyunyana zanikwa izinsuku ezingu-21 ukuthi zisayine isivumelwano lathi lesi sikhathi siphela ngoJuni 18.
“Okwamanje zingu-48.8% izinyunyana ezisasayine isivumelwano sokunyuswa kwamaholo. Ziyasayina ezinye njengoba zazifune isikhathi sokuthi zixhumane nanamalungu azo.”
Ukuze isivumelwano siphase kumele sisayinwe u-50+1 wezinyunyana ezisenkundleni yokubhunga ngamaholo.
Okhulumela iCosatu, uMnuz Sizwe Pamla, uthe iPSA ayiyona ingxenye yeCosatu ngakho ngeke bezwe ngayo ukuthi kumele benzeni.
Uthe izinyunyana ezikwiCosatu zisaxhumana namalungu azo wathi uthemba ukuthi zizohlangabezana nezinsuku ezingu-21 ezibekiwe zokwenza lokhu.
“Sizobiza isithangami uma seluphothuliwe lolu hlelo,” kusho uPamla.