Umnyango awunamandla kolayini ngaphandle
UMNYANGO wezaseKhaya uthi akukho ongakwenza ngabantu asebevule “ibhizinisi” lokubambela abanye ulayini emahhovisi abo ngoba lokhu kwenzeka ngaphandle kwehhovisi.
Imenenja yoMnyango wezaseKhaya KwaZuluNatal, uMnuz Cyril Mncwabe, ithe bayazi ukuthi kunabantu abakhokhela abahlala ezitaladini ukuthi bababambele olayini ebusuku noma entathakusa. Usho kanjena nje uMncwabe kunezikhalo zokuthi umuntu oyedwa oqashelwe ukubamba ulayini kuyenzeka abamele abantu abangu-10.
Omunye wababehambele ihhovisi lalo mnyango eMgungundlovu ngoLwesibili uthe ungene ngenkani ehhovisi ngesikhathi etshelwa ngowesifazane obengaphambi kwakhe ukuthi kunabantu abangaphambi kwakhe, abengazange ababone kulayini abese eme kuwo amahora angaphezu kwamane.
“Ngingene ngenkani ehhovisi lo wesifazane engitshela ukuthi kunabantu abangaphambi kwami, engingazange ngibabone kanti bese kunesikhathi ngibona ukuthi kunabantu abavele baqhamuke sebengena nje ngaphakathi, thina silokhu sime ndawonye. Ibuhlungu le nto abayenzayo ngoba uma ufika uyabala ukuthi ulandela abantu abangaki, bese uyacabangela ukuthi ngesikhathi esithile uzobe usuqedile. Ngiyasola ukuthi nabasebenzi balo mnyango bayazi ngalo mkhuba, mhlawumbe nabo bayahlomula. Owesifazane ebengixabana naye ungene ngaphakathi wazongisabisa ngokuthi abantu abafana nami abahlali emhlabeni, bayafa,” kusho owesifazane
UMncwabe uthe sebeke balwenza uphenyo bethunywe yinhlokohhovisi eyayithole izinsolo zokuthi abasebenzi babo yibo abadayisa izikhala, bangabuthola ubufakazi.
“Ngeshwa thina asikwazi ukuhambe sibuza abantu abame kolayini ukuthi bazimele bona noma bamele abanye nokuthi bamele abantu abangaki. Thina sisiza abantu abangene ngaphakathi emahhovisi ethu. Onogada bethu bagade okwenzeka ngaphakathi,”kusho uMncwabe.