I-DUT isayine isivumelwano nenyuvesi eseFrance
KUQOPHEKE umlando izolo eDurban University of Technology (DUT), kusayinwa isivumelwano sobudlelwano nesikhungo semfundo ephakeme eFrance, okuzovulela izitshudeni amathuba okuyofunda phesheya.
Izitshudeni zaseDUT zizoba semathubeni okuyofunda eMontpellier University eFrance, osekuqalile ngokuthi kukhethwe uKwanele Kunene ozofulathela elakuleli ngoSepthemba. UKwanele owenza iPhd kwiChemistry, ungowokuqala ukuya eFrance emuva kwalesi sivumelwano sokusebenzisana.
IPhini lakaShansela waseDUT, uSolwazi Thandwa Mthembu ngoLwesibili lihlangane noMnuz Christopher Farnaud oyinxusa laseFrance, kwasayinwa izivumelwano. Lesi sivumelwano sisho ukuthi kuzosizwana ngokufundisa izitshudeni emkhakheni wezokucwaninga, ezobuchwepheshe, baphinde bafundiswe nolimi isiFrench.
IFrance izophinde ilekelele ekwethulweni kweProduct Life Management Competency Centre (PLMCC), okuyisikhungo sokuqeqesha ophikweni lweEngineering and Built Environment eDUT. Lesi sikhungo siyingxenye yezikhungo eziningi ezisungulwe wuMnyango wezeMfundo ePhakeme eFrance ngokusebenzisana nenkampani i3-D Solutions Dassault Systèmes. Kulindeleke ukuthi iDUT ibe yisikhungo esiphambili ukuqeqesha izitshudeni kwezobuchwepheshe obuphezulu bamakhompyutha emuva kokusebenzisana neFrance. Isivumelwano esisayiniwe sizothatha iminyaka emibili, kuqokwe inxusa laseFrance elizofundisa izilimi zakhona eDUT.
Ekhuluma ngokuqokwa kwakhe uKwanele, uthe uzimisele ukuyoncela ulwazi azobuya asize ngalo izitshudeni zakuleli. Uthe uzofunda izinyanga ezingu-18 enza ucwaningo lwakhe okuzomsiza ukuqedela iPhd yakhe. “Lokhu kusho isiqalo sobudlelwano obuqinile neFrance futhi ngiyajabula ukuthi ngingowokuqala ukuvulela amathuba izitshudeni zaseDUT.” UKwanele akaqali ukuthola ithuba lokuyofunda phesheya njengoba ebuye ngoJulayi ngonyaka odlule e-University of Latvia, e-Europe lapho ebenza khona iHonours Degree kwiChemistry. Nakhona uthe ufunde ukuthi lwenziwa kanjani ucwaningo nokuthi angalugodli ulwazi alutholile. Isikhungo saseFrance sizoxhasa ucwaningo lukaKwanele izinyanga eziyisithupha zokuqala, abuye aqhubeke ukuphelelisa izinyanga ezingu-18 okudingeka azenze.