Umkhankaso weBLF ukwezokuxhumana
USUSEZINKUNDLENI zokuxhumana umkhankaso womholi weqembu iBlack First Land First (BLF) wokweseka iNgonyama Trust neSilo Samabandla ukuze kuphikiswane nesinyathelo sokudla umhlaba ongaphansi kweNgonyama.
Leli qembu eliholwa nguMnuz Andile Mngxitama lishintshe ukwenza ukuze lizitholele ukwesekwa ezindaweni eziphethwe amakhosi KwaZulu-Natal njengoba selingene shi kulo mkhankaso.
Liphikisana nesiphakamiso sesigungu sikaMnuz Kgalema Motlanthe sokuba kuhlakazwe lolu hlaka, bese umhlaba esiwuphethe unikezwa uhulumeni.
Ngeledlule iBLF ihambele izindawo ezisenyakatho yaKwaZulu-Natal okuhlanganisa neNkandla zigovuza abantu ukuba bangavumi ukuba iNgonyama Trust iphucwe amandla okuphatha umhlaba osezindaweni zabo ngoba uzonikezwa abamhlophe abayizigwili.
Kuleli sonto iqale umkhankaso ezinkundleni zokuxhumana onezingqwembe ezinesithombe seSilo.
Lezi zingqwembe zinemibhalo ethi “Hands Off iNgonyama Trust, Respect the King” - okungahunyushwa ngokuthi “yekani phansi iNgonyama Trust, hloniphani iSilo”.
Ekhuluma eNkandla umholi wale nhlangano, uMngxitama uthe bazimisele ukulwa ukuze bavikele Isilo nomhlaba weNgonyama Trust.
“Thina siyiBLF sizimisele ukweseka Isilo ukuze ingenzeki le nto eshiwo oMotlanthe. Okunye esikuqaphelile ukuthi selokhu kuphume ubaba uJacob Zuma ekuholeni izwe amakhosi aseyadelelwa, asebukelwa phansi yikho sekuthiwa awaphucwe umhlaba.”
Ngesikhathi esho kanje kucacile ukuthi umphakathi uyameseka njengoba bekunanela ihlombe kuqhume nomkikizo uma ekhuluma.
Ngisho izethameli bezisho ukuthi ngeke zivume ukuphucwa umhlaba unikezwe uhulumeni.
Kumanje iqembu i-EFF okuyilo eliqhuba indaba yomhlaba ePhalamende, lifuna umhlaba uthathwe ubes ezandleni zikahulumeni.
Isigaba u-25 somthetho okhuluma ngomhlaba siphakamisa ukuthi kumele kube uhulumeni ozonquma ukuthi abantu bazokwabelwa kanjani umhlaba.
Okunye ukuthi labo abazobe bedinga umhlaba okungaba ukwakha imizi noma amabhizinisi, kuyomele banikezwe imvume yeminyaka engu-25 bekulowo mhlaba.
Uma kuphela le minyaka sekungaba uhulumeni onqumayo ukuthi ngabe uyakuvuselela ukuqhubeka ngokusebenzisa noma ukuhlala kulowo mhlaba.
NgoDisemba, i-ANC ithathe isinqumo sokuba kufanele uhulumeni achibiyele lesi sigaba-25 ukuze kuthathwe umhlaba ngaphandle kwesinxephezelo.
UMengameli Cyril Ramaphosa naye ukugcizelele lokhu kodwa uqinisa idolo abatshalizimali ukuthi lolu hlelo bazolwenza ngokucophelela ukuze kungalimali umnotho.