Bayadlondlobala kwa-Unilever
KUNYUSE izinga lokukhiqiza kwa-Unilever kwanciphisa nezindleko ukuba khona kwemboni eseMaydon Wharf eThekwini, engeyesibili enkulu emhlabeni wonke jikelele. Kule mboni kwethulwe nomshini omkhulu wokupheka imikhiqizo, iBiomass Boiler okubize uR50 million ukuyifaka okwenza kukhiqizwe amathani amaningi ngonyaka.
Le mboni kuthiwa yavulwa yiLever Brothers emuva kokuvula eyokuqala ebizwa ngePort Sunlight, e-England.
UMnuz Luc-Olivier Marquet oyiPhini likaMengameli omkhulu kwaUnilever, uthe kwenze omkhulu umehluko ukuba khona kweBoiler, esebenza ngemikhiqizo engenawo amafutha.
“Sisebenza ngemishini engawasebenzisi amafutha futhi siyakunciphisa nokwakheka kwemfucuza edalwa imikhiqizo yamapulangwe. Sinethemba lokuthi ukuba khona kweBoiler kuzosiza ukunciphisa izindleko zemikhiqizo ngoR17 million ngonyaka,” echaza.
Ukuba khona kweBoiler kuthiwa kunciphise nomoya ongadingeki, ongcolisa imvelo.
UMnuz Phahle Phalane oyiSourcing Unit Director, uthe le mboni yavulwa ngo-1912 yaqala ukukhiqiza insipho kuphela ngo-1973. Uveze ukuthi zingu-11 izimenenja kule nkampani, eziyisishiyagalombili okungezabesifazane. Uthe bayakholelwa ekunikeni amathuba abesifazane abayingxenye enkulu ekuthuthukiseni umnotho. Ingu-12 imikhiqizo eyenziwa kule mboni.
UPhalane ugcizelele ukuthi bakubeka phambili ukuthuthukisa intsha nokuvula amathuba omsebenzi njengoba benikeza nangemifundaze kwezobunjiniyela. “Nami ngiwufakazi wokuthi abakwa-Unilever bakukhathelele ukuthuthukisa nokudala amathuba omsebenzi. Ngaqala ngifunda ngomfundaze wakhona kwezobunjiniyela. Ngangingeke ngibe nayo imali yokufundela ubunjiniyela ukuba angiwutholanga lo mfundaze,” kusho yena.
Ugcizelele ukuthi bawutshala nakubasebenzi babo umoya wokulekelela ezinhlelweni zomphakathi ukuze uthuthuke. Uthe ukuthuthukiswa komphakathi kunomthelela ekuthuthukeni komnotho. Ulinganise ngenkulisa iMakabongwe abayisiza ngokuyixhasa ezidingweni zayo, lokhu okuyingxenye yezinhlelo zokusiza umphakathi.
Echaza ngeBoiler, uPhalane uthe inezinyanga eziyisishiyagalombili ikhona kanti kwathatha izinyanga ezine ukuyifaka. Abebekhona kuvulwa ngokusemthethweni iBolier bakhonjiswe ukuthi isebenza kanjani. Bakhonjiswe nezingxenye zemboni lapho kwenziwa khona imikhiqizo yabo. Abakwa-Unilever bagcizelele ukuthi bazibophezele ukunciphisa ukungcolisa imvelo ngemikhiqizo yabo, asebeshintshe ngisho amaphakethe ayo ngoba kudala abenziwa ngopulasitiki.