Asifunde ukwenza okukhulu ngokuncane
NGESIKHATHI ethula isabelo-mali ePhalamende uNgqongqoshe wezaManzi nokuThuthwa kweNdle uMnuz Gugile Nkwinti wakhuluma ngokubaluleka kokuphathwa ngendlela kwezimali kanjalo nokongiwa kwamanzi kwazise siyizwe elingenawo kangako.
Eqhuba wathi yize izimvula zakamuva zithe ukwenisela ikakhulukazi eNtshonalanga-Kapa, kodwa kumele siqhubeke nokonga amanzi kungenjalo siyobe sibuyisela emuva umsebenzi osuwenziwe ukubhekana nezinselelo zokuhlupheka, ukungalingani ngamazinga okuphila kanjalo nokusweleka kwamathuba omsebenzi.
Wabe esesho nokuthi ngenxa yobukhulu bomsebenzi ohambisana nokuqikelela ubukhona bamanzi ezweni, cishe ingxenye engaphezulu kukaR12 billion yesabelo-mali esinguR15.6 billion somnyango ezosetshenziselwa ukuthuthukisa ingqalasizinda yamanzi.
Ngamanye amazwi uNkwinti wayegcizelela ukuthi kumele sonke sizame ukuzifundisa ukwenza okukhulu ngokuncane.
Njengesikhungo sikahulumeni esibhekele ukuphakela amanzi izimboni ezinkulu ezisenyakatho nesifundazwe nemiphakathi ehlala ezindaweni zasemakhaya, uMhlathuze Water uzazi kahle izinselelo ezihambisana nokuqikelela ukuthi amanzi ayafinyelela kulabo abawadingayo.
Esikhathini esiningi lokhu kusuke kusho ukuthi kumele sithathe izinqumo ezinqala ngokuthi imali encane esiklanyelwe yona ukwenza lo msebenzi sizoyisebenzisa kanjani ukuze imiphakathi yethu ihlomule ngamanzi aphephile okuphuza.
UMhlathuze Water ususebenzise uR270 million ukuhlomulisa izinkampani ezingaphansi kwabamnyama, intsha nabesimame.
Ngale kwalokhu siphinde sibe nohlelo olubizwa ngeSupplier Development Programme lapho sisuke sithatha khona osonkontileka abasafufusa sibafake ngaphansi kwesandla salabo abakhulu uma kunemisebenzi ukuze nabo bakwazi ukwenza inzuzo baphinde bahlomule ngamakhono.
Kodwa siyazi ukuthi kunezingqinamba ezifana nokungaphathwa ngendlela kwezimali ezingasivimba ekutheni sifeze leli phupho lethu lokuletha amanzi emphakathini nokuthuthukisa ngakwezomnotho kwabantu bakithi. Ngenxa yalokhu sesiqhamuke nezinhlelo zokuqikelela ukuthi imali iphathwa ngendlela futhi yenza lokho ebekelwe kona.
Kuyasithokozisa ukuthi uNkwinti usanda kumemezela ukuthi ibhodi elengamele ukusebenza koMhlathuze Water lizokhethwa kungekudala ngoba lokhu kusho ukuthi lesi sikhungo esibaluleke kangaka sizokwazi ukuqhubeka nomsebenzi esinikezwe wona wokuletha impilo engcono kubantu. Kanti phakathi kwezinto ungqongqoshe akhala kakhulu ngazo kwaba ukungaxhumani ngendlela phakathi komasipala nezikhungo ezibaphakela amanzi okudala ukuthi kokunye kuthikamezeke ukulethwa kwamanzi emphakathini. Njengesu lokugwema lokhu, siwuMhlathuze sesiqinise amaxhama okuxhumana phakathi kwethu nemiphakathi esisebenza nayo nomasipala ukuze ngaso sonke isikhathi siqikelele ukuthi akuthikamezeki ukulethwa kwamanzi.
UNgqongqoshe waphinde wayihlaba esikhonkosini ngesikhathi ethi: “ukusebenza ngokwehlukana nokungabambisani phakathi kwezinhlaka ezihlukene kuholela ekutheni kume nse imizamo yethu yokuphuthumisa intuthuko kubantu.”
SiwuMhlathuze Water siwuzwe kahle umyalelo kangqongqoshe futhi siyaqhubeka nokwenza konke okusemandleni ukuqikelela ukuthi imiphakathi esiyisebenzelayo iyaneliseka ngezinsiza esiyihlenzeka ngazo.
Lokhu sikwenza ngoba siyazi ukuthi uma sihudula izinyawo kumbe singazisebenzisi ngendlela izimali ezibekelwe ukuletha amanzi kubantu singashiya imiphakathi eminingi ibhekene nosizi lokuphuza amanzi lapho kuphuza khona imfuyo futhi anezifo eziningi ezifana nesichenene.
Kungakho-ke nje sithi sizimisele futhi sizibophezele ekuphakeleni imiphakathi yethu amanzi ahlanzekile ngaso sonke isikhathi. UMnuz Mthokozisi Duze ubambe njengesikhulu esiphezulu eMhlathuze Water