Isimnxenxa ngemali ethe xaxa uBilliat iSundowns
IMAMELODI Sundowns isiphinde yabeka okwengeziwe etafuleni emizameni yokuncenga umdlali ophelelwa yinkontileka, uKhama Billiat, ozanyelwa iqembu elisha naphesheya kwezilwandle.
Inkontileka kaBilliat neSundowns iyaphela ekupheleni kwenyanga. Wenqabile ukuyivuselela. Bekulindeleke ukuthi kucace ngekusasa lakhe maphakathi nesizini kodwa kugcine kungenzekanga.
Umqeqeshi weSundowns, uPitso Mosimane, usekhale waze washa izwi, ebalisa ngoBilliat, ephumela obala ngokuthi ufuna ahlale eChloorkop. Imenenja kaBilliat, uMichael Ngobeni, iveze ukuthi lo mdlali ufunwa ngamaqembu ahlukene phesheya kwezilwandle okukhona kuwona awaseFrance, Saudi Arabia nasenhla ne-Afrika. Ithe umbango omkhulu usuphakathi kwelinye iqembu laseMzansi nelase-Asia. UNgobeni uthe abajahile ukuthatha isinqumo ngekusasa likaBilliat.
“UKhama ungomunye umdlali, akabheki imali. Ubheka ukuthi uzojabula yini lapho eya khona nokuthi umndeni wakhe uzokwazi yini ukuba nawo futhi ujabule. Thina okwethu wukumenzela uphenyo olunzulu ngamaqembu amfunayo. Sibheka iqembu, abalandeli nendlela azophatheka ngayo. Akafuni ukuya phesheya ngoba esebona ukuthi iminyaka isihambile kodwa ufuna ukuyothokozela ukudlala ibhola, yikhona okuphambili kuyena. Ufuna ukudlalela iqembu lesizwe, bamlindile kulona,” kusho uNgobeni.
“ISundowns iphinde yabuya nokungcono kodwa siyitshelile ukuthi ayime kancane sisacubungula zonke izincelo esinazo. Iyikhaya lakhe futhi uyayithanda, nomqeqeshi uPitso uyamthanda uKhama. Ngakho ngeke siyichilize kanjalo nje uma kukhona ekushoyo. Asijahile ukuthatha isinqumo.
“UKhama usenenkontileka neSundowns ezophela ekupheleni kwenyanga. Amaqembu ayazi ukuthi emuva kwalokho uzobe engasenalo iqembu. Akadingi ukuyozama inhlanhla. Ubengumdlali ovelele kwi-Absa Premiership, walala isibili e-Afrika.”
Emaqenjini aseMzansi obekuthiwa afuna uKhama kukhona iKaizer Chiefs ne-Orlando Pirates ezoqala umkhankaso wokuwina iCAF Champions League. UBilliat udlale iminyaka eyisihlanu kwiSundowns emthenge kwi-Ajax Cape Town.
UKhama ucashunwe ethi: “Njengomdlali kuyiphupho ukuyodlala phesheya kwezilwandle kodwa mhlampe kuhlukile kimina. Ngifuna ukuya phesheya ngezizathu eziyizo. Angifuni ukuya phesheya ngoba sengihanjelwa yiminyaka, ngifuna ukuya phesheya ngoba kungifanele ukuba khona. Ngifuna ukuya phesheya ngoba ikhono lami lingivumela ukuthi ngibe khona. Futhi ngifuna ukuba semaqenjini athize, emazweni athize engikholwa wukuthi kungifanele ukuba kuwona, hhayi ngoba kuse-Europe ngigcine ngingasajabule, sengibuya. Kodwa ngiyathandaza ukuthi isinqumo esizophuma naso kube ngesilungile.”