UZondo weDolphins ufuna ukuzibonakalisa kumaProteas
UKAPUTENI weHollywoodbets Dolphins, uKhaya “Mlilo” Zondo, uthi ukhalela ithuba lokuzibonakalisa kumaProteas ukuze azibeke ethubeni lokuba ngomunye wabadlali abazomela isizwe kwiNdebe yoMhlaba ezoba se-England naseWales ngonyaka ozayo.
Ngaphandle kokunikwa umsebenzi onzima wokuhola iDolphins, uZondo uphinde athwale iqembu ngokukwenza kokubili ukushwiba nokubhetha. Nakuba inhliziyo nomoya kusavuma ukuba uZondo, obefunda eWestville Boys High School, agijime kwelesizwe, engxoxweni ekhethekile naye uthe ukugqoza kwamathuba okuzibonakalisa kwelesizwe yikona okuyikhathazayo.
“Kuyiphupho labo bonke abadlali ukumela iqembu lesizwe kwiNdebe yoMhlaba. Kepha okubalulekile njengamanje wukuthi nginikezwe ithuba lokuba ngizibonakalise. Liyothi lingavela lelo thuba bese ngikhipha amangwevu kucace-ke ukuba ngiyahamba noma cha. Ngiyafisa kakhulu ukudlala kwelesizwe ngibe ngomunye wabadlali abasiza iqembu,” kusho uZondo.
NgoFebhuwari ngonyaka owedlule, uZondo umenyezelwe njengokaputeni weDolphins ngemuva kokushiya kukaMorne Van Wyk isikhundla. Njengamanje usengukaputeni weqembu lesizwe elaziwa ngeSouth Africa “A”. Ugcine ukubonakala kumaProteas ngoFebhuwari 16 beshaywa kabuhlungu i-India ngo 5-1 ochungechungeni lwemidlalo yosuku olulodwa eyisithupha.
UZondo uphinde waphawula ngokukhuza ibuya kukaDavid Miller kwiDolphins ngemuva kweminyaka emibili ashiya iqembu walibangisa eFree State kwiVBK Knights.
“Uzoba ngumdlali onamava kunathi sonke eqenjini. Njengokaputei ngilindele ukuthi asihole abe yisibonelo esihle kubafana abasakhula. Sijabule kakhulu ngokubuya kwakhe, sinethemba sizonqoba indondo eyodwa noma ezimbili siholwa nguyena,” kusho uZondo owazane noMiller kusuka ngo-2010.