Bazongqimuzana koweFox Sports
ISIKHONDLAKHONDLA senkampani esakaza ezemidlalo emhlabeni jikelele, iFox Sports, sihlele indumezulu yomqhudelwano wesibhakela ozobanjelwa eSibaya Casino and Entertainment Centre, eThekwini, ngoJuni 27.
Le ndumezulu yomqhudelwano eyaziwa ngeFox Sports Africa Boxing, izoba nezimpi eziyisikhombisa, okubalwa kuzona nezimbili zebhande leWBA Pan African.
Ngesikhathi kwethulwa lo mqhudelwano eSibaya Casino izolo, uKyle de Klerk ongumqondisi weFox Sports Africa, uthe kuzoba khona abashayibibhakela abaqhamuka emazweni ayisithupha ase-Afrika okubalwa kuwona iTanzania, Uganda, Zambia, Cameroon, Botswana neNingizimu Afrika. Lesi sikhulu sithe inhloso enkulu yale midlalo ukufukula abashayisibhakela abancane futhi abangaziwe.
“Sifuna ukuqala isahluko esisha esibhakeleni saseNingizimu Afrika. Sifuna kufukulwe abashayisibhakela abasafufusa ezwenikazi lonke i-Afrika. Ngiyafisa ukukusho ukuthi akukhona nje kuphela ukuthi sihambele kuleli kuphela. Siphuma nakwamanye amazwe njengeNigeria, Botswana, Swaziland namanye amazwe amaningi ase-Afrika.
“Uzokhumbula ukuthi iFox Sports ibukwa emazweni angu27 emhlabeni jikelele ngakho laba bashayisibhakela bazothola ithuba lokuzimaketha babonwe. Sikhethe iKwaZulu-Natal ngoba sibona ukuthi isibhakela sesifadabele khona kungakho sifuna ukusivusa,” kusho uDe Klerk.
Uveze ukuthi lona kuzoba ngumqhudelwano wesikhombisa ezinyangeni eziwu-18 abawenza e-Afrika. Lesi sikhulu sikuqinisekisile ukuthi banesivumelwano nenhlangano eyengamele amankomane kuleli iBoxing South Africa (BSA) ngalo mqhudelwano. Siveze nokuthi sisezingxoxweni nenhlangano yokusakaza iSouth African Broadcasting Corporation (SABC) ukuba le midlalo isakazelwe nabantu bakuleli. Sezizonke izimpi ezizoliwa zimi kanjena:
Impi yeWelterweight enemizuliswano emine phakathi kukaKagiso Bagwasi waseBotswana noMuhammadi Sabata waseUganda.
Impi ye-International Featherweight Contest enemizuliswano emine phakathi kukaRicardo Hiraman waseNingizimu Afrika noTshepang Babui waseBotswana.
Impi yebhande leWBA Pan African Super Flyweight elingaphethwe muntu, enemizuliswano ewu-12 phakathi kukaSikho Nqothole wakuleli noSunday Kiwale waseTanzania.
Impi ye-International Super Featherweight yemizuliswano eyisithupha phakathi kukaJeff Magagane wakuleli noKutlwano Ogaketse waseBotswana.
Impi ye-International Cruiserweight enemizuliswano eyisithupha phakathi kuka-Amos Temfuma waseZambia noJayden Matthew wakuleli.
Impi yokuhlungelaibhande leWBA Pan African Heavyweight enemizuliswani eyisithupha phakathi kukaJustice Siliga wakuleli noMarc Subramoney wakuleli.
Kube eyePan African Lightweight yemizuliswano ewu-12 phakathi kuka-Ayanda Nkosi noCosmos Cheka waseTanzania.