Kubalulekile abadlali babe namava: Stuart Baxter
USTUART Baxter uthi akusho ukuthi sekumele bakhacwe, badaxazwe ngaphandle abadlali abenze amaphutha emidlalweni yeBafana Bafana kwiCosafa Cup kodwa kusemqoka ukuthi bafunde emaphutheni abo.
Umqeqeshi weBafana ubephendula umbuzo wokuthi ngabe umdlali ofana noLuther Singh, obengekho ezingeni kule midlalo, ngeke esaba khona yini eqenjini lesizwe.
Ngempelasonto uSingh wakhombisa ubuthuntu emapalini emdlalweni weBafana neMadagascar waze wageja nephenathi kwaba wukuphuma kweBafana ekudlaleleni igolide njengoba isizodlalela indawo yesihlanu ehambisana nepuleti.
NgoLwesibili uSingh akawuqalanga umdlalo. IBafana ishaye iNamibia ngo 4-1 wamagoli amabili kaLebohang Maboe, Siyanda Xulu no-Aubrey Modiba.
“Le khempu akusiyona eyokuthi umdlali anikezwe ithuba elilodwa bese elahlwa le ngoba nakhu enze amaphutha. Okusemqoka wukuthi abadlali bathole amava okudlala namaqembu aqinile. Bakwazi ukusebenzisa ibhola kulezo zimo. Uma uLuther efunda emaphutheni akhe usazolithola elinye ithuba. Kodwa uma eqhubeka nokwenza lawo maphutha nokuthatha izinqumo okungezona, ngicabanga ukuthi kunobulungiswa ukuthi kube khona abaqalayo endaweni yakhe,” kusho uBaxter.
Kusasa iBafana izodlala neBotswana kowamanqamu wepuleti ePeter Mokaba Stadium, eLimpopo, ngo-5 ntambama.
UBaxter uthe isifiso sakhe wukunikeza bonke abadlali abasekhempini ithuba lokudlala.
KoweNamibia uqalise uSiyabonga Ngezana weKaizer Chiefs noGift Links abebengaqalanga koweMadagascar.
“Ngike ngakhuluma nezinye izikhulu, ngasho ukuthi angifuni sizishaye isifuba ngokuthi sinqobile kodwa asiziqhenye ngokuthi sithathe isinqumo sokubiza abadlali abancane sabanika ithuba lokudlala ezingeni lomhlaba base benza kahle,” kusho uBaxter.
Njengoba iBafana ingayi kwiNdebe yoMhlaba eRussia eqala ngoJuni 14, umdlalo wayo omqoka ungoSepthemba. Izobhekana neLibya eMoses Mabhida Stadium, eThekwini, ngoSepthemba 8 emlenzeni wokuqala wokuhlungela i-African Cup of Nations.