Sibonga uShenge ngobuholi bakhe obungashintshi
MHLELI: Ngiyathokoza ukuthola ithuba lokuthi siyiqembu Inkatha sizwakalise ilaka lethu ngendawo esiphila kuyo yaseSikhaleni.
Iqembu lethu lifisa ukubonga ngokujulileyo uMntwana waKwaPhindangene. Lapha ngikhuluma ngazo zonke izindawo ezinalabo abangamalungu eqembu lethu nabathanda uMntwana nemisebenzi yakhe ayenze ehola uhulumeni waKwaZulu.
Ngizogxila kakhulu kulezo zindawo eziselokishini nalezo ezakhele amakhosi, okuyinkosi uDube nenkosi uMkhwanazi. Kusifanele ukuba sincome futhi sihalalise ngoba uma singakwenzi lokho intsha ekhula namuhla engakaze ikubone ukuhola kweNkatha ingaba nokungaqondi ukuthi yini eyake yenziwa yiqembu nomholi walo seSikhaleni namaphethelo.
Njengeqembu Inkatha sizobalula lezo ezibaluleke kumuntu usuku nosuku okungukuthuthukiswa kwedamu iCubhu nokwakhiwa komuzi waseSikhaleni. Amanzi aphuzwa laphaya ngamanzi asendaweni yenkosi uDube futhi ebesuka nasenkosini uMkhwanazi. Thina esihlala emakhaya la manzi ngalezo zikhathi besiwaphuza mahhala, singakweleti muntu ngesikhathi kusaphethe uShenge. Okuhle wukuthi amanzi nangalezo zikhathi abehlanzwa kahle siwaphuza esehlanziwe.
Sinesiteshi samaphoyisa. Usizi esasibhekene nalo lwalunzima kwakufanele umuntu uma edinga usizo lwezomthetho aye eMpangeni okwabe kuyindawo esiza kakhulu abamhlophe kodwa iqembu Inkatha layisondeza yaba phakathi kwethu.
KwezeMpilo kwakhiwa ngokubambisana nomphakathi imitholampilo eniyibonayo eSikhaleni nezikole ezigcwele kulo muzi. Kukhona umtapo wolwazi, ikolishi elaliqeqesha othisha nemigwaqo enetiyela, sinenxaxathela yezitolo ngenxa yalowo hulumeni owawufisa ukuba kuxhaswe umuntu omnyama.
Siyabonga futhi nakulabo, noma bengasekho emhlabeni, ababengongqongqoshe beminyango ehlukene. Asikaze sizwe iphunga lenkohlakalo noma okuncane nje ukweba nokudliwa kwemali.
Siyaziqhenya ngobuholi bakho Shenge ne-IFP. Namanje iqembu lethu limelene nenkohlakalo noma ngabe eyaluhlobo luni siyikhahlela ngazo zombili. Ukuququdwa kwemali bume sekuyimfashini kwezepolitiki namhlanje.
Kusifanele njenge-IFP ukuba sigiye ngesihlangu sethu.