Isikhathi besesifikile kuMthembu
HAKAMA Mthembu ixesha lifikile.” Bebemkhuthaza ngala mazwi uBongmusa Mthembu ngesikhathi esemzileni ebheke eMoses Mabhida Stadium, eThekwini izolo emjahweni weComrades obuqale eCity Hall eMgungundlovu.
Kuthe selikhanya ilanga sebeya ngokwanda abantu abebethamele umjaho endleleni, bezilokhu zisho njalo zithi uMthembu nguyena okufanele awunqobe umjaho.
Ugcine eyishayile intambo engena eMabhida kuchwaza inkundla wena owabona kuhlangene izintandokazi zamaqembu kanobhutshuzwayo. Abanye abalandeli bebememeza bethi “Bulwer, Bulwer, Bulwer” indawo adabuka kuyo uMthembu.
Ngesikhathi umbhobho umemezela ukuthi useyeza osendaweni yokuqala abantu, abebengaphandle kwenkundla, bagijime bazongena ngaphakathi befuna ukuzibonela insizwa ishaya intambo.
Kuthe uMthembu eseqhantshe waphuma phambili sebedlula ePinetown, abantu bebelokhu bemmemezile, abanye besifazane bahluleka nokuzibamba baqonda kuyena bemubamba. Kuze kwalamula amaphoyisa. Ngisho izingane ezincane emuva kwakhe zimemeza zithi “Mthembu, Mthembu, Mthembu.” Abanye bebethi “Phakama Mvelase”.
Ungene eMabhida washaya isiphambano, wakhomba phezulu ngezandla zombili wase elala ja phansi. Uthe ephakama lapho wase eya koxhawula izikhulu wadlulisa nomyalezo abewuphethe kwiMeya yaseThekwini, uNkk Zandile Gumede, obuvela kwiMeya yaseMgungundlovu uMnuz Themba Njilo.
Ube esemukela indebe yakhe yegolide ewuphawu lokuthi ungumpetha ayinikezwe yisikhulu seComrades, uCheryl Winn, ahambe eyiphakamisa eyibhekise ezihlweleni nakwabezindaba.
UMthembu wazakhela ugazi nodumo enqoba iComrades ngo-2014 kusukwa khona eMgungundlovu kuyiwa eThekwini. Ngonyaka olandelayo akazange enze kahle njengoba wawushiya phansi umjaho. Wathi wayengaphathekile kahle emoyeni egulelwa unina wezingane.
Ngo-2016 waphuma endaweni yesithathu kunqoba uDavid Gatebe njengoba nyakenye edle ubhedu.