Udele umndeni onqobe umjaho
UDELE umndeni umpetha weComrades Marathon, uBongmusa Mthembu, ohlale izinyanga ezintathu eLesotho elungiselela lo mjaho osuke eMgungundlovu wayophela eMoses Mabhida Stadium eThekwini izolo.
UMthembu (34) ungene emabhukwini omlando eba ngowokuqala omnyama ukunqoba kathathu lo mjaho ongeminye yemikhulukazi emhlabeni. Akwenzile kwagcina ngoBruce Fordyce eminyakeni elinganiselwa kwengu-30 edlule. Unqobe ngo-5:26:34.
Umqeqeshi kaMthembu, uXolani Mabhida, exoxa neSolezwe ngemuva komjaho uveze ukuthi lo mgijimi odabuka eBulwer udele konke ezilungiselela.
“Sihlale izinyanga ezintathu siziqeqesha eLesotho noThuso (Mosiea) no(Nkosinathi) Duma. UMthembu ubedela ngisho nomndeni wakhe njengoba sisuke ekhempini sazogijima. Akazange aye ekhaya. Kwesinye isikhathi izimo zasekhaya zike zikuphazamise ukulungiselela umjaho. Kudingeka ukuthi uzinike isikhathi esanele sokuziqeqesha ungaphazanyiswa yilutho,” kusho uMabhida. Laba bagijimela i-Arthur Ford Athletic Club.
Ekhuluma nabezindaba uMthembu ukuvezile ukuthi ubengazi nokuthi umndeni wakhe ukhona enkundleni.
Ukuqinisekisile ukuthi bese kuphele izinyanga ezintathu awugcina.
“Ngesikhathi ngigqashula ulayini ngifikelwe umunyu ngoba bengingakholwa ukuthi ngizoqeda ngenxa yezingqinamba engike ngabhekana nazo ngaphazamiseka nasekuziqeqesheni kwami. Ngivuke ngazithatha ngaya kobona (umndeni) sengizwa ukuthi bakhona odadewethu nabafowethu enkundleni ngoba bengingalindele,” kusho uMthembu.
Sekuwunyaka wesibili uMabhida ofundisa kwamanye amakolishi eqeqesha uMthembu. Nanyakenye badle umhlanganiso kusukwa eThekwini kuyiwa eMgungundlovu.
“Esikwenzile emjahweni bekuyicebo lethu njengoba besiziqeqesha ndawonye. Bobathathu laba bagijimi bayazimisela futhi bayasebenzisana. Besikuhlelile ukuthi uThuso ahambe nabo ku-30km bese eyabadedela bese uDube ephuma kwabangu-10 abaphambili elekelela ukuphusha uMthembu. Nangempela kwenzeke kanjalo. Nesikhathi asitholile uMthembu yileso ebengisibhekile. Ngasho phambilini ukuthi isikhathi esisibhekile siphakathi sika-5:15 no-5:28,” kusho uMabhida.
UDuma ungene endaweni ka-10 enza isikhathi esingu-5:47 kwathi uMosiea wangena endaweni ka-20 enza u-5:59.
“Bengingalindele ukuthi ngingenza isikhathi esihle kangaka kodwa ngokusebenzisana noMthembu noDuma ngikwazile ukwenza isikhathi ebesingasilindele. Okwenzekile bekungaphezulu kwalokhu ebesikuhlelile,” kusho uMosiea.