Kunconywe umgijimi ongenamlenze
UTHATHWE njengeqhawe umsubathi ogijime iComrades Marathon okokuqala ngomlenze owodwa.
UXolani Luvuno (33) wasePitoli, owanqanyulwa umlenze emuva kokutholakala kokuthi unomdlavuza wethambo, ugijime isikhathi esingu-16:50 emjahweni osuke eMgungundlovu waphelela eMoses Mabhida Stadium eThekwini.
Uqale ukugijima phakathi kwamabili ngenxa yesimo sakhe. Abanye abasubathi baqale umjaho ngo-5.30 ekuseni. Ubehambisana nomngani wakhe uHein Venter obemsiza endleleni.
UVenter naye ubengakwazi ukugijima kahle njengoba ehlinzwe idolo nonyaka ngenxa yokulimala.
ULuvuno ngesikhathi eshaya intambo eMoses Mabhida izinkumbi zabasubathi ezingene naye beziqonda kuye zimbongele zimtshela nokuthi uyiqhawe lazo ngokuba nesibindi agijime ngomlenze owodwa.
Abanye abasubathi abebeqeda naye bebelimisa ngembaba elokuthi bona bebegcina ngci ukuba kulo mjaho ngenxa yobunzima bawo kodwa uLuvuno uthe ngonyaka ozayo uyabuya ukuzokwenza kangcono.
“Ingenza ngithobeke indlela abantu abangijabulela ngayo, ngizizwe ngifikelwa umunyu uma abantu bengitshela ukuthi ngiyiqhawe. Uma ngicabanga ubunzima engidlule kubona ngize ngifike lana, kuyangicacela ukuthi kumqoka ukuba uzethembe ukuthi ungakwazi ukwenza okuthize uma usuzitshelile emqondweni wakho,” kusho uLuvuno.
Umngani wakhe, uVenter elandisa Isolezwe wamthola emgwaqweni uLuvuno ecela.
“Eminyakeni emibili edlule ngamthola ehlala emgwaqweni ngathi ngifuna ukumnikeza umsebenzi, wangitshela ukuthi kuzoba nzima ngoba ucwile esidakamizweni inyaope notshwala. Ngamtshela ukuthi ngizomsiza, kusukela lapho wayeka izidakamizwa notshwala. Waqala ukugijima. NgoSepthemba 2016 wagijima u-5km, ngo-2017 wagijima u-21km njengoba eseqede iComrades yakhe yokuqala,” kusho uVenter.
ULuvuno uthe obekumgqugquzela kakhulu emgwaqweni abantu abebemnikeza ithemba lokuthi angaqeda.
Uthe ufisa abantu bafunde ngaye ukuthi ungakwazi ukwenza noma yini oyihlosile.
Phakathi kwabanye okuvele ukuthi baqede umjaho ngumculi uKabelo Mabalane. uthe