UZikalala ucacisa ngokubonakala ecaleni likaZuma
UMXHUMANISI wobuholi besikhashana be-ANC KwaZulu-Natal, uMnuz Sihle Zikalala, ucacise ngenhloso yakhe yokuhambela icala lobengumengameli uMnuz Jacob Zuma osolwa ngenkohlakalo. UZuma ubevele okwesibili eNkantolo eNkulu eThekwini ngoLwesihlanu lapho kubonakale khona inqwaba yabaholi namalungu e-ANC eyomeseka. UZikalala uthe ukubonakala kwakhe eseka uZuma kungenxa yokuthi usuke efuna ukuqondisa ukukhuluma okungekuhle okusabalele ngabaholi benhlangano. Uthe usuke eziyele njengesakhamuzi sakuleli hhayi njengelungu noma umholi we-ANC KwaZulu-Natal. Uveze nokuthi usazoqhubeka nokuya ngoba akaboni hlazo yena kulokho.
“Uma uzoqaphelisisa ngalolo suku lwecala ngangifake ijakhethi ye-ANC kodwa ngayikhumula sengiya ecaleni ngoba bengiya njengomuntu nje bengingayomela i-ANC. Angiyiboni inkinga kulokho ngoba wonke umuntu uvumelekile ukuya enkantolo,’’ kusho uZikalala
Esekhuluma nabezindaba eceleni uthinte nendaba yekhomishini ephenya ngokulawulwa koMbuso yidlanzana eholwa iPhini leNhloko yamaJaji uRaymond Zondo. Ikhomishini isiqalile ukwenza umsebenzi wayo njengoba abanolwazi bengaluletha kuyona.
UZikalala uthe abantu abangalinge babhule babe yizangoma ngodaba lokulawulwa koMbuso wathi kufanele ikhomishini inikwe ithuba lokwenza umsebenzi wayo ukuze kuvele iqiniso. UZuma ungomunye wabavelayo kwabasolwa ngokuba nesandla ekulawulweni koMbuso yidlanzana. Usolwa ngokuvumela abangani bakhe bakwaGupta ukuzitapela emalini yabakhokhi bentela.
UZikalala wesekwe uNkk Nocawe Mafu oyilungu lesigungu esiphezulu kuzwelonke, othe angaya kokweseka uZuma noma nini.
“Nami nje ukuba benginaso isikhathi bengingaya ngoba yinto engenankinga ukuya ecaleni likaZuma,’’ kusho uNkk Mafu.
UZikalala ugxeke ilungu lesigungu esiphezulu kuzwelonke uMnuz Bheki Cele ngokuhlomekisa amalungu enhlangano.
Ukhale kakhulu ngesitatimende sikaCele asenze ngonyaka odlule ngoDisemba lapho athi amalungu awaqhubeke nokuyisa i-ANC ezinkantolo ukuze iqonde ngqo.
UZikalala uthe lesi sitatimende siyadukisa asiyisizi inhlangano.
Usole nabanye abaholi abasezinhlakeni zikazwelonke ngokuba nesandla ekutshaleni uqhekeko enhlanganweni wathi kuyadinga ukulungiswa lokhu.
“Ngesikhathi sixoxa namaqabane kuvelile ukuthi kukhona ukungeneliseki ngezinto ezehlukene kodwa okunye okuvelile kube yinkinga yabaholi bakuzwelonke abaphehla ukungezwani.’’
UCele ethintwa ngalezi zinsolo ezenziwe uZikalala uvele wangaphawula wathi akakwazi ukukhuluma nabezindaba ngalokho.