Ingebhe yokungenzi kahle kweKZN ngenxa yabaduduliwe
UKUNYUKA unyaka nonyaka kwesibalo sabafundi abadudulelwe ka-matric KwaZulu-Natal sekufake ingebhe yokuthi kungehlisa izinga lokuphasa kwesifundazwe ngoba abanye abenzi kahle.
Lokhu kuvezwe yisikhulu esibhekele izivivinyo eMnyangweni wezeMfundo KwaZulu-Natal uDkt Barney Mthembu ethula imiphumela yekota yokuqala yabafundi baka-matric kulo nyaka.
Lesi sifundazwe sinabafundi abevile ku-30 000 abadudulelwe ka-matric.
UMthembu uthe banezinselelo abafundi abaduduliwe nakuba abafundi balo nyaka benza kahle.
Uthe uma kungafakwa umfutho emkhankasweni wokubasiza kungehla izinga lokuphasa lesifundazwe.
“Bakhona abazamayo kodwa uma kunganyuswa umfutho lesi sifundazwe singehlelwa yizinga lokuphasa. Sinethemba lokuthi ukufundiswa kwabo ngamaholidi kuzosiza kakhulu.”
UNgqongqoshe wezeMfundo, uMnuz Mthandeni Dlungwane, uthe zikhona izinhlelo ezenziwayo zokulungisa isimo njengakho ukufunda ngamaholidi.
Uthe kunezinhlelo zokuthi kufundise othisha abangongoti befundisa ezikoleni ezehlukene besebenzisa ne-internet.
Uthe like lehla izinga lokuphasa esifundazweni ngo-2014 wathi kodwa izinto sezingcono.
“Silinyusile izinga lokuphasa kusuka ngo-2016 nangonyaka odlule. Ngiyazi izifunda esihlangene nazo (Umlaza, Pinetown neLembe) zinganyusa izinga ngoba zenza kahle. Kumele nakanjani silinyuse izinga.”
Umemezele nokuthi sezishintshile izinto ngemuva kokusabela ikhwelo leMbube wathi ehhovisi lakhe sekukhona uDkt Ngogi Mahaye osephethe.
UMahaye nguthishanhloko ngakho izinhlelo zizoshintsha.
“UMahaye useyi-head of ministry wayenguthishanhloko ngiyazi izinhlelo zokusebenzisana zizoqhubeka.”
UMahaye uke wahola uhlelo lokuphucula imiphumela emnyangweni kanti phambilini wayenguthishanhloko wesikole esenza kahle eNkandla iVelangaye Comprehensive Technical High.