Kubukiswe ngomkhumbi otakula abanye
USUTAKULE amanye amazwe ase-Afrika antula ngobuchwepheshe kwezocwaningo umkhumbi wakuleli obekubukiswa ngawo eThekwini ngempelasonto.
Izakhamuzi zakuleli zibe nenhlanhla yokuzibonela umkhumbi obizwa ngeSA Agulhas II, abanikazi bawo okuwuMnyango wezeMvelo. Umbukiso womkhumbi ubuhambisana nokugujwa kweWorld Oceans Day ngoLwesihlanu. Amalungu omphakathi nabafundi bezikole ezehlukene bebengena bededelana bezobona umkhumbi ongu-134 metres ubude.
UMnuz Marco Worship, oyiTechnician kulo mkhumbi, uthe ungowokuqala okuleli zinga e-Afrika. Uthe uma kwakhiwa eminye imikhumbi sekuyobukelwa kuwona ngenxa yezinga lawo.
“Wakhiwe ngokwehlukile ukuze uhlale isikhathi eside emanzini. Uyakwazi ngisho nokuhamba uma kuneqhwa emanzini. Uma kunezimo eziphuthumayo emanzini kubizwa wona uzotakula ngoba uyakwazi nokudonsa eminye imikhumbi,” kusho uWorship.
Lo mkhumbi, okudle uR1.5 billion ukuwakha, usetshenziswa ukucwaninga ngezesayensi njengoba uvula namathuba okuqeqesha abakwamanye amazwe. Unemishini esezingeni eliphezulu ebona ngisho ekujuleni kwamanzi, kuhlolwe nezilwane.
UWorship uthe lo mkhumbi, okuhlonishwe ngawo owayengumculi wakuleli uMiriam Makeba, usuneminyaka eyisithupha wakhiwa. Ngaphakathi kunegumbi elinoxhaxha lwezithombe zikaMakeba obebizwa ngoMama Afrika. Ulandela iSA Agulhus I abanikazi bayo okuyiSA Maritime Authority. Balinganiselwa ku-100 abantu abangamumathwa wumkhumbi. Ngaphakathi kunesibhedlela esinodokotela oyedwa obhekene nokusiza uma kukhona abagulayo nezimo eziphuthumayo. Kukhona nesikebhe esincane kuwona umkhumbi esisiza ukutakula abagibeli uma kunezimo eziphuthumayo. Kulesi sikebhe kuthiwa abantu bangahlala amasonto amabili besatholelwa usizo uma kunesimo esiphuthumayo. Lo mkhumbi unezitezi eziyisishiyagalolunye. Izolo ufulathele elakuleli waya eTanzania lapho uzoba nezitobhu eziningi emachwebeni ocelwe kuwo ukuyothekela ulwazi kubafundi abasemkhakheni wezamanzi nezesayensi. Uzobuyela kuleli bese uya eCape Town.