Usiza abafundi abacija kwi-Accounting
BAZOLUGUBHA ngendlela ehlukile uSuku lweNtsha abafundi baka-matric abazoncela ulwazi lwe-Accouting eNyuvesi yaKwaZuluNatal (UKZN).
UDkt Msizi Mkhize, ofundisa i-Accounting kule nyuvesi, ukhethe ukuthi agubhe uSuku lweNtsha uJuni 16, ngempelasonto esiya kuyo esiza abafundi baka-matric ukuthi banyuse izinga lokuphasa i-Accounting ku-matric.
“Le nto yokufundisa abafundi ngiyenza minyaka yonke. Ngayiqala ngo-2015 ngithi ngifukula isizwe esimnyama ngisiza abafundi abangenzi kahle ezifundweni i-Accounting. Uthola ukuthi abafundi abenzi kahle ezifundweni iMaths ne-Accounting kanti uma abafundi bengenzi kahle kuzona zombili lezi zifundo abaphumeleli.”
Uthe esikhathini esiningi kunakwa kakhulu izifundo iMaths neSayensi wathi i-Accounting ayinakwa.
“Noma yimuphi umfundi ofisa ukuza kulolu hlelo wamukelekile njengoba izitshudeni ezenza iBCom Accounting zizongilekelela. Bangaphansi kwenhlangano ebizwa nge-Association of Black Accountants (ABASA). Umfundi ka-matric uyophuma azi ukuthi uyokwenzani ephepheni, uvele asithande kakhulu lesi sifundo,” kuchaza uMkhize.
Uthe ufundisa ngezindlela eziningi ezenza kube lula futhi abafundi bakubambe kalula abakufundayo.
Uqhube wathi benza izingoma ukuze bagcine sebezicula izibalo futhi kube mnandi ukwenza le sifundo.
“Sisebenzisa namaphepha eminyaka edlule. Silindele abafundi abangu-1 000. Lolu hlelo luzobasiza kakhulu abafundi.”
Uthe ubejwayele ukulwenza ngoSepthemba kodwa kulo nyaka unqume ukulusondeza ukuze abafundi bakwazi ukuthi uma befaka izicelo zokufunda emanyuvesi bafike nemiphumela emihle.
Uqhube wathi njengoba kuyinyanga yentsha babuyisela emphakathini ngokufundisa abafundi. Kungenwa mahhala.