Kumele zilekelelwe izakhiwo zobukhosi
MHLELI: Izakhiwo zobukhosi nezinkantolo zamakhosi ziseneqhaza elimqoka okumele zilibambe ekugcineni imiphakathi eyakhele amakhosi inokuthula nenhlalakahle yemindeni.
Lokhu kumele njalo kutuswe, kuqikelelwe ukuthi kulezi zinkundla akukho ukunyathelwa kwamalungelo abantu futhi nemithetho elandelwayo ingashayisani namalungelo abantu ahlinzekwe wuMthethosisekelo.
Kumele uhulumeni aqinisekise ukuthi lesi sakhiwo sobukhosi sithola ukulekelelwa okusezingeni kanye noqeqesho. Akekho ovela ngaphambi kwalezi zinkantolo okumele athunazwe isithunzi sakhe noma athole ukwahlulelwa okungenabo ubulungiswa.
Nabantu abavela kulezi zinkundla kumele batshelwe ngamalungelo abanawo uma benganelisekele ngezinqumo ezithathwayo.
Akumele bazithole bengenayo indawo yokudlulisela izigwebo abazitholayo noma basatshiswe uma becabanga ukukwenza lokho.
Ngike ngavakashela kwesinye nje isigcawu senduna yakwenye indawo ngizozilalelela ukuqhubeka kwezindaba ezikhulunywayo. Ngafica kunodaba lwebhungu elino-27 okuthiwa likhulelise intombi ethile, abakubo kwentombi sebefuna amahlawulo. Leli bhungu lihlala ekhaya konina noninalume. Uma ulalele udaba usungafunga kungumalume omithisile. Ngisho inhlawulo kuthiwa ayikhishwe nguye ngoba ibhungu alisebenzi, londliwa nguyena. Kuphoqelelwa umalume ngoba nakhu esebenza, akunabo ubulungiswa. Lokhu futhi kudunga ubudlelwane obuhle phakathi kukamalume nomshana.
Ngezinye izindlela le nkundla ithwesa umalume icala lokuthi uvumelani ukugcina umshana wakhe aphinde amondle engakasebenzi ekubeni isimo somnotho sisibi ngale ndlela.
Le nto yimbi ithunaza ukuthenjwa kwezigcawu zasemakhaya. Akwemukelekile ukuba kungaganga omunye umuntu kodwa bese kuphoqwa omunye umuntu ukuba amhlawulele. Udaba lokuhlawula kungaba nguye ogangile ongacela umalume wakhe ukuba amhlawulele hayi ukuba inkundla imphoqe.
Kuhle ukuba abazali bentombazane bafune amademeshe kubantu abazalisa izingane zabo, kuyisiko elihle okumele livikelwe kodwa akumele kone omunye bese abazali beyofuna amahlawulo komunye ngoba nakhu bebona ukuthi iklezile. Yizinto ezinjengalezo okumele ukuba zilungiswe. Siyabonga Mazibuko EBHUCHANANA