Abasakazi abayeke ukwenza into abangayifundele
eNingizimu Afrika sesithukile ngendlela okubulawa ngayo abantu besifazane kodwa lokho akusho ukuthi abasakazi bethu abathathele abantu izinqumo njengoba sebenza nje.
Kukhona ukuthanda umuntu ngendlela yokuthi uma nixabene akudleki, akulaleki. Amaphutha ayenzeka othandweni kodwa lokho akusho ukuthi umsakazi akabe nelungelo lokutshela lowo muntu ukuthi akahlukane nomuntu athandana naye.
Ngibona kufana nokuphaka impi lokhu abakwenzayo abasakazi ngoba umfana uzolobola aqede, bese bexabana nengoduso yakhe ishayele emsakazweni ibika ngokuxabana kwabo, umsakazi athi mshiye wena njengoba behlala besho nje. Ingoduso izomshiya ngempela lowo muntu obeyilobola kwazise iyakholelwa kumsakazi. Uyezwa ngakusasa sebembulele lowo sisi ngenxa yokuthi owesilisa ubengafuni ukwaliwa.
Ngokwami ngithi abantu abathandanayo abanezinkinga ake baye kumfundisi ebandleni abakhonza kulo, kumalungu omndeni noma kwabakufundele ukweluleka abantu hhayi ukuthi bafune usizo kubasakazi ngoba ngokubona kwami sengathi bona isinqumo basikhipha ngalena kokujula ngenkinga ezobhekana nalowo muntu osenkingeni.
Sonke singaba ngamajaji ngoba umuntu uma ebulele singavele sithi akagwetshwe udilika jele kodwa abantu abakufundele lokho bayacwaningisisa baqoqe nobufakazi bese kuba yima bemgweba umuntu.
Ngizama ukuxwayisa abasakazi bethu asebevele babe amajaji angakufundele ukuba amajaji, odokotela bothando nabemindeni yabantu, ukuthi le nto abayenzayo abayiyeke ngoba izokona izinto eziningi.
Bona abayalele abantu lapho bengasizakala khona futhi baqhubeke nokushumayela ivangeli lokuthi abangabulawa futhi abangashaywa abesifazane bagcine lapho.
Abasakazi mabayeke ukugamanxa ezindabeni zabantu abathandanayo ngoba abawufundele lowo msebenzi.
Mabaqinise ekusakazeni nokusidlalela izingoma. Ngiyabonga Thanda Chonco EMPANGENI