Kugujwe iWorld Oceans Day
KUCISHE kwaphazamiseka izinhlelo zomgubho weWorld Oceans Day ngoLwesihlanu emuva kwezindaba ezimbi zokulimala kwamatilosi amabili ngoLwesithathu e-East London, e-Eastern Cape. Kudingeke ukuthi abakwaSouth African Maritime Safety Authority (Samsa) bakhiphe indiza enophephela emhlane ukusiza amatilosi.
Kuthiwa amatilosi abehamba ngomkhumbi IKS Flora obuseduze ne-East London, uphikelele echwebeni iMuara, eBrunei. Kuvela ukuthi isimo esibi sezulu yisona esiholele ekulimaleni kwamatilosi aphuthunyiswe esibhedlela. Kuthiwa elinye itilosi lilimale kanzima emlenzeni elinye lathinteka ithambo onyaweni.
UMnuz Jared Blows, okhulumela iSamsa, uthe baphuthumise usizo baxhumana nethimba labo ebeliseduze ukuze kusizakale amatilosi. Uthe kuthintwe udokotela ukubheka isimo samatilosi ngaphambi kokuthi kuthunyelwe indiza ewaphuthumise esibhedlela. UBlows uthe udokotela uyalele ukuthi amatilosi akhishwe ngokushesha emkhunjini. Kwenzeka lokhu nje bekugcizelelwa ezokuphepha ngesikhathi kugujwa iWorld Oceans Day.
Kulo nyaka kugxilwe ekutheni kuqiniswe ezokuphepha kwezamanzi, kuncishiwe nokungcoliswa kwemvelo namanzi. Lo mgubho ubuwenziwe ngokuhlanganyela naboMnyango wezeMvelo ukunciphisa ukungcoliswa kwamanzi okudalwa yimikhumbi nemfucuza elahlwa olwandle. Kuphinde kwaqwashiswa nangezingozi zasemanzini nokho okuthiwe azijwayelekile kuleli.
Oyisikhulu sakwaSamsa, uMnuz Sobantu Tilayi, uthe nsuku zonke kusetshenziswa imikhumbi ukuthutha izimpahla ezisetshenziswa wumphakathi namabhizinisi. Uthe kubalulekile ukuthi kugwenywe izinto ezingaba nomthelela omubi ekusebenzeni kwemikhumbi namachweba. Kugxilwa ekuqiniseni ezokuphepha ngoba imikhumbi ibuye ikhiphe amafutha okuthiwa angcolisa amanzi. UTilayi uthe sebeqalile izinhlelo zokulwa nokungcoliswa kwemvelo.
“Sifuna ukuqinisekisa ukuthi amanzi ahlanzekile, siqhubeke nokuhwebelana namanye amazwe ngokuthutha izimpahla esimeni esigculisayo,” kusho uTilayi.