Umqeqeshi usabhala ecisha ngomqhudelwano
UMQEQESHI kaKevin “Two Guns” Lerena, uPeter Smith, ubamba uyayeka ngesimemo sokuyolwa emqhudelwaneni womhlaba iWorld Boxing Super Series.
USmith, usecathulise uLerena wamenza omunye wabashayisibhakela asebeqala ukubhekisiswa esibhakeleni somhlaba. Ngesonto eledlule uLerena uvikele ngempumelelo ibhande le-International Boxing Organisation (IBO) cruiserweight ehlula ngamaphuzu uRoman Golovashchenko wase-Ukraine. ULerena ubeqala ukuvikela leli bhande kusukela eliwine ngoMashi lingaphethwe muntu ehlula uDmytro Kucher waseUkraine empini ebikade iseEmperors Palace, eGauteng. Ubuqhawe abukhombise ebhekene noGlovashchenko buholele ekutheni afakwe ohlwini lwabashayisibhakela abazolwa kwiWorld Boxing Super Series phesheya kwezilwandle. Lo mqhudelwano, ohambisana nesizumbulu sikaR633 million kozowina, uqhatha abashayisibhakela abaphezulu kwi-cruiserweight emhlabeni wonke.
USmith uthe usafuna ukukhuluma nomphathi weGolden Gloves, uRodney Berman, ngaphambi kokuthatha isinqumo.
“Ngizoxoxa noBerman kuleli sonto ngizwe imininingwane yonke ngalo mqhudelwano. Kufanele ngithole ukuthi obani abanye abashayisibhakela abakhona. Imali iyaheha impela. Kodwa kufanele ngicabangele uKevin. Uma kukhona abashayisibhakela abaziwayo kungaba yingozi ukuya khona,” kusho uSmith.
“Abantu abazi ukuthi uKevin ngimakhe kanjani. Kufanele ngilinakekele ikusasa lakhe. Kuningi okusafanele ngimfundise khona. Bekulula kimina ukuvuma, ngimphonse emphandwini wezingonyama kodwa ngicabangela ikusasa lakhe. Lokhu abantu abakubona manje kuyena yizinto ebengilokhu ngimfundisa zona. Angiyena lo mqeqeshi obona ibhokisa lakhe lilwa kahle impi eyodwa bese ezitshela ukuthi useyingqwele.”
ULerena ungumshayisibhakela wesibili eMzansi ukumenywa emqhudelwaneni omkhulu kulo nyaka. Umpetha weWorld Boxing Organisation (WBO) bantamwewight uZolani, “Last Born” Tete, uzolwa kwiWorld Boxing Super Series esisindweni sakhe. Kubashayisibhakela ababhekwe kwiWorld Boxing Super Series kukhona umpetha weWorld Boxing Council (WBC) ne-WBO, u-Oleksandr Usyk waseUkraine owahlula uThabiso Mchunu ngomngqimuzo womlalisa phansi ngo-2016, noMurat Gassiev waseRussia ophethe ibhande le-Interntional Boxing Federation (IBF) neleWorld Boxing Association (WBA) Super.
“Isunqumo silele kimina, hhayi komunye umuntu. UKevin uyangethemba. Isibhakela ngesesikhashana, kumele wenze imali kodwa kufanele sibheke ubungozi. Angifuni siye laphayana ukuyokwengenza isibalo. Uma siqoka ukungenela umqhudelwano, kufanele siyowina.” kusho uSmith.