Kucishe konakala kokaSenzo Meyiwa
inhloso yawo obekuwukuqoqa imali yokuqala iSenzo Meyiwa Foundation, uvumile ukuthi kuke kwaba khona ukungaboni ngaso linye.
“Kuke kwaba khona imimoya engatholani. Kodwa ngibatshelile ukuthi ngiyazi ukuthi uma sihambile kuke kube khona esikutholayo lapho sisuke simenywe khona yimikhandlu. Lapha bebengekho abaxhasi ngakho lokhu esikutholile kumele kuqale emndenini. Uma siqhubeka sizobambisana ngezinye izinhlelo ukuthi uma bebuya bakwazi ukuthi bajabule. Ekugcineni bashilo ukuthi bayawabona amaphutha bacela ukuqhubeka nomdlalo,” kusho uSikhakhane.
Uthe kusize ukungenelela kukaProfessor Ngubane obelibamba kuchwaze inkundla, ukudambisa umoya.
Ngemuva kwalokho lo mdlalo obekungowokugcina uqhubekile ngaphandle kwezinkinga njengoba ubudle nangamagoli okujabulise abalandeli.
Phakathi kwabadlali abebephumile ngu-Andile Jali, Thanduyise Khuboni, Thamsanqa Gabuza noThami Sangweni. Kwabangasadlali bekukhona uSiyabonga Sangweni, Lucky Lekgwathi, Steve Lekoelea, Fabian McCarthy, Jabulani Mendu, Mbulelo Mabizela noJaphet Zwane.
“Lena akuyona into yami ngedwa. Ngiyafisa ukuthi sibambisane ukuya phambili. Ngiyabonga kumajita ngokuthi afikile. Ngiyethemba ukuthi ngoba sekwenzekile sizoluthola uxhaso. Singqongqozile kodwa kwangalunga,” kusho uSikhakhane.
Uthe bazohlala phansi nababambisene nabo babale inzuzo abayenzile njengoba bekungenwa ngemali bese beyihambisa emndenini kaMeyiwa. Isifiso sakhe wukuthi umcimbi ube oweminyaka yonke futhi uzimisele ngokuqhubeka asebenzisane nazo izinkakha ebezisemdlalweni.
USiyabonga Sangweni umbongile uSikhakhane ngokuhlanganisa umcimbi.
“Ngiyafisa ukuthi kube khona abaxhasi ukuze igama likaSenzo liyohlale likhunjulwa. Ngiyabonga kuNtokozo ngokuthi akwazi ukuqhamuka nalo mqondo.”
Uyise kaMeyiwa, uSam Meyiwa uthe wesulwe izinyembezi ngokwenzeka kwale midlalo.
“Inhliziyo yami ijabule kakhulu eminyakeni engaka ngikhala, izinyembezi sezigcwele imiphongolo. Ngiyethemba lesi sekuyisiqalo sokuthi kuqaqeke amafindo abekade ebophile. Ngibonga uNtokozo oqale le nto wafika ekhaya wazocela ukuthi yenzeke ukuze igama likaSenzo lingavele liphele futhi nathi sikwazi ukuthi sisizakale njengomndeni,” kusho uMeyiwa omdala.