Ummeli udele imali elungiselela umjaho
UDELE imali ayihola ngokuba ngummeli wasemajajini wagxila ekulungiseleleni iComrades Marathon umpetha walo nyaka wabesifazane, u-Ann Ashworth odle ubhedu izolo emjahweni obusuka eMgungundlovu uphelele eMoses Mabhida Stadium, eThekwini.
U-Ashworth (34) ogijimela iMassmart ungene entanjeni ngo6:10:04 walandelwa womunye umgijimi waseNingizimu Afrika, uGerda Steyn, ogijimela iNedbank ongene ngo-6:15:34.
Umgijimi waseRussia, u-Alexandra Morozova, ungene endaweni yesithathu ngo-6:20:21. Wayekade eqede endaweni yesibili nyakenye ngemuva kukaCamille Harron wase-USA ongazange abuye ukuzovikela isicoco sakhe ngenxa yokulimala.
Ekhumula nabezindaba u-Ashworth ubonge umndeni nomqeqeshi wakhe ngokumeseka. Ubengalindele ukunqoba yize bona bebekholelwa kuye.
“Kungishaqile ukuthi nami ngila. Ngilandele iqhinga lo mqeqeshi. Bekuwumjaho ongajwayelekile ngoba usheshe zibekwa. Kodwa ngizitshele ukuthi ngizogijima ngendlela ebengihlele ngayo. Ngiyabonga kakhulu emndenini wami nomqeqeshi ngabangenzele kona. Bengingasebenzi izinyanga ezimbili. Uma ungasebenzi uwuadvocate awuholi. Ngiyabonga futhi angizisoli ngesinqumo sami,” kusho u-Ashworth odabuka eKapa kodwa osezinze eGauteng. USteyn ungomunye wabebebhekiwe ukuthi banqobe kwabesifazane. Ngo-Ephreli udle ubhedu kwiTwo Oceans Marathon.
Emjaweni wabesifazane kuqale kuhamba phambili umpetha wango-2016, uCharne Bosman, kodwa ogcine edlulwe yilaba abebemlandela. Ugcine eqede endaweni yesihlanu ngo6:33:08.
“Umjaho wabesifazane ubusezingeni ebelilindelekile. Besingekho isikhathi sokuhlala ngemuva. Leli golide lingena ezindondweni esengizitholile kulo nyaka,” kusho uSteyn.
USteyn, oneminyaka ewu-28, uthe akasoze ayeka ukugijima iComrades Marathon yize abanye bemthatha ngokuthi usemncane.
UMorozova ubalise ngokungayitholi imali yakhe yanyakenye. Uthe inhlangano eyengamele ezokugijima, i-Athletics South Africa (ASA), ifuna isiqiniseko sokuthi ukufanele yini ukugijima iComrades.
Yize kunjalo uthe isimo abhekene naso asizange simthene amandla okuthi abuye kulo nyaka.
Umengameli we-ASA, u-Aleck Skhosana, uthe: “Izwe lakhe limisiwe yi-IAAF thina esilandela imithetho yayo. Igama lakhe alikho ohlwini olwathunyelwa yiyona lwabagijimi abavumelekile ukubamba iqhaza emiqhudelwaneni. Ngeke sikhulume ngemali. Uma ufuna ukukhuluma ngayo kumele ulandele yonke imigudu efanele.”
Abaphume phambili kwabesifazane: Ann Ashworth (6:10:04) Gerda Steyn (6:15:34) Alexandra Morozova (6:20:21) Tanith Maxwell (6:20:35) Charne Bosman (6:33:08) Sophia Sundberg (6:45:24) Devon Yanko (6:47:44) Sarah Bard (6:49:05)