Inkakha ixwayisa ozoqeqesha iChiefs
UZOBHEKANA nenselelo yokunqoba isicoco zibekwa amagqozo umqeqeshi omusha weKaizer Chiefs ukuze azakhele ugazi kubalandeli beqembu osekuphele amasizini amathathu bebulawa isomiso sezindebe.
Lena yindlela abona ngayo uFabian McCarthy, omunye osibheke ngabomvu isinqumo seChiefs ngomqeqeshi omusha ozothatha kuSteve Komphela.
UKomphela uhlale amasizini amathathu kwiChiefs wasula kungasekuhle maphakathi nesizini edlule ngemuva kokuthi abalandeli bevuke umbhejazane baze bashisa inkundla iMoses Mabhida Stadium, eThekwini. UKomphela akazange anqobe neyodwa indebe kule minyaka ayihlale kuMakhosi, into ebiqala ukwenzeka emlandweni weqembu.
Kumanje kulindelwe ukuthi abaphathi beqembu bamemezele umqeqeshi omusha njengoba kuthiwa sekusele amagama ambalwa okuzokhethwa kuwo. Phakathi kwababalwayo kukhona igama likaAvram Grant noMick McCarthy.
“Kunzima ukugculisa abalandeli, kwesinye isikhathi kunzima ngisho ukugculisa abadlali uma ungumqeqeshi. Kodwa uma umqeqeshi omusha enganqoba (iMTN 8) lokho kungamsiza ukuthi azinze kahle emsebenzini wakhe. Ngeke sikufihle ukuthi abaqeqeshi bahlulelwa ngezindebe ikakhulukazi kulesi simo iChiefs ekusona. Uma engawina le ndebe uzobe esebawinile abalandeli beqembu abathile bese egxila emidlalweni yeligi.
“Uma engalandelisa ngeTelkom Knockout ngoDisemba uzobe eseyintandokazi. Angakwazi nokuthi afake umbango kwiligi ngoba ngokwami iChiefs ibingasele kakhulu ngalapho wukuthi indlela ebiyenza ngayo kweminye imidlalo ibingagculisi,” kusho uMcCarthy.
UMcCarthy ungomunye wabadlali abawaziyo umuzwa wokujabulela ukunqoba izicoco naMakhosi. Wayekhona eqenjini elanqoba isicoco seligi ngo-2004/2005.
Uthe okwenzeka kwiChiefs usekubuka njengomlandeli, yingakho inethemba lokuthi umqeqeshi ozoqashwa uzokwazi ukubuyisa izikhathi zenjabulo eNaturena.
“IChiefs idinga umqeqeshi oqinile, osezingeni eliphezulu ozofika namaqhinga aphusile emidlalweni futhi oyiqondayo indlela yokudlala yakuleli. Kuzomele akwazi obekwenzeka eqenjini. Alethe abadlali abasha azokwakha ngabo iqembu. Ngiyethemba ukuthi izinto zizoshintsha ngokushesha, iChiefs ibuyele kulokhu eyaziwa ngakho.”
Ngokwakhe umqeqeshi osezingeni yilo ozofika akwazi ukwenyusela abadlali ezingeni elingcono kunaleli abebekulona.
“Ngiye ngingathandi ukuncoma abaqeqeshi ngokuthi bahle kodwa owenza kahle umsebenzi ngimehlulela ngokuthi afike akwazi ukwenyusa izinga labadlali, abadala nabasha sibone izinga ebesingalazi. Umqeqeshi ozofika kuzodingeka ukuthi enze lokhu, alungise isimo ebesikhona bese enqoba izicoco. Konke lokhu kuzomele akwenze kanye kanye ngenxa yesimo iChiefs ekusona njengamanje,” kusho uMcCarthy.
Ngaphandle komqeqeshi omusha okunye okubhekiwe kwiChiefs ngabadlali ezobachitha nezoqinisa ngabo isikwati. Ngemuva kokuthi uKomphela esulile iqembu lathembisa ukuthi lizokhuculula nakubadlali.
Kulabo elingacaci ikusasa labo kukhona uTsepo Masilela ongazange adlale isikhathi esiningi ngesizini edlule, uKeagan Buchanan, okuke kwavela ukuthi uzanyelwa ukuthi inkontileka inqanyulwe ngenxa yokungalitholi ijezi. Omunye u-Edmore Chirambandare waseZimbabwe naye obephikwa yimidlalo. Njengoba kuzovulwa iwindi lokuhwebelana ngabadlali bekubhekwe ukuthi iChiefs iqinise ngo-Andile Jali noVincent Pule kodwa bobabili labadlali sebeyiphunyukile. UJali usayine kwiMamelodi Sundowns, uPule ukhonjwa kwi-Orlando Pirates.