Imicimbi yeYadini Lounge
ZIZOBE ziqinile ezokuphepha kuyona yomithathu imicimbi ehlelwa umnikazi wendawo yobumnandi Eyadini Lounge, uJabulani Zama, njengoba kusondela umcimbi omkhulu wamahhashi iDurban July.
Kulo mcimbi wamahhashi oba seGreyville, eThekwini, kuzoba netende elaziwa ngokuthi Eyadini Village.
Kusuka ngoLwesihlanu Eyadini eMlaza kuzoba nomcimbi wokuvula umcimbi omkhulu wamahhasi, kube khona ozoba ngoMgqibelo eGreyville bese kuba nowokugcina ozoba seYadini wokuvala umcimbi.
UMjey uthe kule micimbi yonke kuzobe kuboshelwe ubumnandi njengoba abaculi bakuleli bezojabulisa abazobe bekhona.
“Lona ngomunye wemicimbi emikhulu kuleli ngakho abantu abaqhamuka ezindaweni ezehlukene basuke bezojabula emcimbini weDurban July, sifuna bahambe bedelile. Sibahlelele okukhulu njengoba ngonyaka odlule senza okufanayo. Ngokuhlela imicimbi emithathu sifuna ukuthi bajabule bangalikhohlwa iTheku bahlale bebuya njalo,” kusho uMjey.
Uthe njengeYadi sebeyaziwa ngokuhlala benza imicimbi yobumnandi wathi nakulokhu ngeke baphoxe.
“Konke abazobe bekufuna bazokuthola kule micimbi. Sihlele ukuthi kuzona zontathu izinsuku kunandise abaculi abanohlonze bakuleli.”
Uthe kule micimbi isiteshi iMetro FM siyobe sikhona. Emcimbini wangoLwesihlanu uthe kuzongenwa ngoR100, iVIP uR200. Emcimbini wangoMgqibelo eGreyville kungenwa ngoR2 250. NgeSonto uMjey uthe kuyobe kungenwa ngoR300, iVIP uR800.
Kubaculi abayobe bekhona kubalwa uSjava, DJ Zinhle, AKA, Mo G, Dineo Ranaka, Oskido, DJ Kotini, L’vovo nabanye.