Ngeke ayivule yonke iMabhida
NGEKE ayivule yonke inkundla yaseThekwini umrepha uCassper Nyovest uma esenza umcimbi wakhe iFill Up Moses Mabhida Stadium, ezoba ngoDisemba 1 nonyaka.
Ngokwe-website yale nkundla, imumatha abantu abangu-56 000 uma behleli phansi kodwa uma kunemicimbi emikhulu iyakwazi ukuvuleka ithathe abantu abangu-85 000.
“Angicabangi ukuthi sizoyivula yonke sithathe u-85 000 ngoba lokho kuzosho ukuthi isiteji sisigxumeke phakathi nendawo sibe wu-360 degrees. Ngisasidweba okwamanje ukuthi sizoma kanjani,” kusho uCassper.
Uthe ulindele manje usuku lo mcimbi ngoba kade abantu bebuza ngoba befuna ukuhlela kusanesikhathi.
Ngemuva komcimbi wakhe iFill Up FNB Stadium ngoDisemba ngonyaka odlule lapho adayisa khona amathikithi angaphezulu kuka68 000, wakusikaza ukuthi uzoza eThekwini.
Lo mrepha izolo ekuseni ufake i-video ekhasini lakhe leTwitter lapho eqinisekise khona usuku lo mcimbi.
Ekhuluma neSolezwe uthe okwamanje akakabi nalo uhlu lwabaculi abazomeseka kulo mcimbi.
“Engingakusho wukuthi ngeke kube abantu abajwayelekile kodwa kuzogcwala abaseThekwini kakhulu ngoba abantu bakhona bayabathanda abaculi babo.”
Uqhube wathi amathikithi azoqala ukutholakala eComputicket ngesonto elizayo.
“Ngeke abize kodwa wonke umuntu uzokwazi ukuwathola. Labo abanemali bazokwazi ukuhlala ngokukhululeka kwiVIP. Sisakhuluma nohulumeni asixhase ukuze amathikithi akwazi ukubiza kahle.”
Kusukela eyifakile i-video likhombise ukuba likhulu isasasa njengoba abantu bebephawula ngalesi simemezelo. Ngabo2 emini ibisisatshalaliswe ngabantu abangaphezulu kuka-4 900.
Uthe ngale micimbi ugqugquzela abantu ukuthi beseke abaculi baseNingizimu Afrika.
“Sinezinkundla ezinhle okumele sizisebenzise futhi ngifuna kugcine kulula ukuthi wonke umuntu azisebenzise.”
Imicimbi yeFill Up yaqala ngo-2015 ngesikhathi egcwalisa iTicketpro Dome, eGoli