Usethembe uphenyo lwamaphoyisa oluzocacisa
UTHEMBE uphenyo lwamaphoyisa ukuthi yilo oluzocacisa ngokushona kwendodana yakhe unina wesitshudeni sesikhungo semfundo ephakeme eThekwini, esithanqazeke esitezi sashona, ngoLwesihlanu.
UNkk Nozipho Khumalo ongunina kaXolani Khumalo (22) waseMlaza obefunda eDurban University of Technology (DUT), uthe namanje akazi ukuthi kwenzekeni endodaneni yakhe osekunemibiko eminingi ngokushona kwayo. Uthe indodana yakhe ebiyenza unyaka wokugcina kwi-Interpretation and Translation, ibingahlali esikoleni njengoba abanye bebecabanga.
“NgoLwesihlanu sahlukana naye ekuseni eya esikoleni, ezobuya njengokujwayelekile. Sabona kushona ilanga engabuyi, uyise wamshayela ucingo lwabanjwa yiphoyisa. Yilapho sithole khona ngesigameko, ngoMgqibelo uyise wayohlonza isidumbu emakhazeni,” echaza.
Uthe akafuni ukungena nokuphendula amahlebezi asequbuke ngokushona kukaXolani ngoba udedela amaphoyisa ukuthi aphenye. Uveze nokuthi akaphathekile kahle ngokungathintwa yisikhungo obekufunda kuso ingane yakhe. Uthe ukube akezwanga ngamaphoyisa akazi ukuthi ubeyozwa ngobani ngalesi sigameko.
Ngokwemibiko esabalele ezinkundleni zokuxhumana nasekhasini likaFacebook waseDUT, kusolwa ukuthi uXolani ubebaleka ngesikhathi ethanqazeka esitezi sesithupha ebholidini eliseML Sultan Campus. Kuthiwa ubephuce esinye isitshudeni iselula, ebalekela ukuthi ubejahwa.
Abanye basole ukuthi ubekuhlosile ukuziphonsa, basola ukuthi ubezibulala.
Abebefunda naye bazichithile zonke lezi zinsolo ezinkundleni zokuxhumana, abathe umufi bebengamazeli lutho olubi. Umufi ushonele khona endaweni yesigameko, njengoba kuthiwa usakazeke ubuchopho.
Isitatimende saseDUT siveze ukuthi umufi wagxuma esitezi sesine eduze kwamathoyilethi abesifazane. Siveze nokuthi imininingwane yomngcwabo izothunyelwa uma sekwaziswe kahle abomndeni kanti balindele ukuthi kucacise uphenyo lwamaphoyisa ngesigameko.
Okhulumela amaphoyisa KwaZulu-Natal, uLieutenantColonel Thulani Zwane ,uthe kuphenywa idokodo lokufa komuntu emuva kwalesi sigameko.
Uthe senzeke ngezithuba zabo 4 ntambama kanti akwaziwa ukuthi yini eholele ekutheni umufi aphonseke esitezi.
Egcina ukukhuluma nephephandaba uSphephelo Mthembu onguMengameli wesigungu sezitshudeni eDUT, ucele ukubuye ashayelwe. Izolo ucingo lwakhe belukhala lungabanjwa.