Banethemba ngeye-ANC emiswe yinkantolo
UMDIDIYELI we-ANC KwaZulu-Natal, uMnuz Mike Mabuyakhulu, uthi banethemba lokuthi bazoba nengqungquthela yesifundazwe emasontweni ayisithupha ezayo emuva kokuphazamiseka ngomzuzu wokugcina kwengqungquthela yabo oNgoye ngempelasonto.
Engxoxweni neSolezwe izolo, uMabuyakhulu uthe bazohlangana nezifunda ezinezikhalo ukuzama ukuthola isisombululo.
“Njengoba kwaziwa ukuthi inkantolo ikhiphe umyalelo wesikhashana lapho inqume khona ukuthi ingqungquthela ingabikhona, ithimba labameli benhlangano sebejutshiwe ukuthi basebenze lolu daba baphinde babheke ukuthi ngeke yini kutholakale olunye usuku olungaphambi kukaJulayi 7, lona obekwe inkantolo,” kusho uMabuyakhulu.
Amalungu e-ANC anganeme aye enkantolo sokumisa ingqungquthela yesifundazawe ngoba ekhala ngokuthi izikhalo zawo azizange zilalelwe.
Amalungu enhlangano ayisithupha avela eMoses Mabhida, Lower South Coast naseHarry Gwala ngeke aze adalulwe ukuwavikela, akhala ngezinto eziningi okubalwa kuzo ukuncishwa ubulungu nokukhishwa ngaphandle ezinhlelweni zenhlangano.