ISilo sifuna incazelo kuRamaphosa
ISILO samabandla, uGoodwill Zwelithini kaBhekuzulu, sifuna uMengameli uMnuz Cyril Ramaphosa, achaze kabanzi ngokuthi kuhlakazwe Ingonyama Trust njengoba sesiqoke abameli abazolwa nokuhlakazwa kwayo.
Lezi zindaba zivele izolo emuva komhlangano wamakhosi neSilo obusoLundi.
Ingonyama Trust yasungulwa ngo-1994 ukuze kuphathwe umhlaba owawuphethwe wuhulumeni waKwaZulu.
INgonyama Trust iphethe u-30% womhlaba waKwaZulu-Natal kanti umuntu oyiphethe yiSilo esibhekele konke okwenzeka emhlabeni ongamahektha angu-2.8 million osezindaweni zasemakhaya.
Owayengumengameli wezwe, uMnuz Kgalema Motlanthe nethimba lakhe baphakamisa ukuthi Ingonyama Trust ihlakazwe futhi umhlaba okuyo uphathwe nguMnyango wezokuThuthukiswa kwezindawo zasemakhaya ukuze wonke umuntu athole umhlaba olinganayo.
Kodwa iSilo namanye amakhosi bathe bazoyiphikisa yonke imizamo yokusiphuca umhlaba waso. Sithe sesiqoke abameli futhi sesekwa nanguNdunankulu waKwaZuluNatal, uMnuz Willies Mchunu othe isifundazwe ngeke sikweseke ukuqedwa kweNgonyama Trust.
“Ngidinga ukukhuluma noMengameli wezwe ngokushesha ukuze angichazele ukuthi kungani uma kukhulunywa ngomhlaba yena abheke owami. Umhlaba wethu unothile, yingakho besisukela, siyayazi impi kodwa sifuna ukuba ngamabutho okuthula,” kusho iSilo.
Sithe ngeke sivumele ukuthi abantu baso bahlukunyezwe wuhulumeni wentando yabantu njengoba sasihlukunyezwa wuhulumeni wobandlululo. Siphinde sathi singayalela abantu baso ukuthi bagodle amavoti abo okhethweni lwangonyaka ozayo uma beqhubeka nokusidelela.
“Kunabantu abasitshela ukuthi umhlaba wethu uzothathwa, sasiwuthathe kobani lo mhlaba? Sihlulelwa ngabantu abangasazi, abangazimisele nokusazi, abasebenzisa amandla ukufeza izinhloso zabo,” kusho iSilo.
ISilo siphinde sacela ukwesekwa ngamaZulu nabantu abahlala emhlabeni waso kungakhathaleki ukuthi baluhlanga luni.
“Akufanele siyithathe kancane le mpi ebhekiswe kithina, iNingizimu Afrika iyasizonda, ngifisa sibambane ukuze sinqobe le nto,” sisho kanje.
Sithe asinankinga nombono kaMotlanthe kodwa inkinga esinayo wukuthi ufuna umbono wakhe wamukelwe ngenkani.
“Samcela (uMotlanthe) ukuthi eze emhlanganweni owawuse-ICC, sifuna yena nethimba lakhe asichazele iziphakamiso abazenzile. Okungidinayo wukuthi kuthiwe Ingonyama Trust yasungulwa wuhulumeni wobandlululo,” kusho iSilo.
Sithe isizwe samaZulu siyachukuluzwa ngoba sasingamukelwanga kuhulumeni wentando yabantu.
“Siphathiswa okwamavezandlebe ezweni lethu, uhulumeni kufanele eze lapha azositshela ukuthi asiye kuphi ngoba isiphethe kabi le nto yokungahlonishwa wuhulumeni we-ANC. Sihlaselwa abaholi abakhethwe ngentando yabantu,” kusho iSilo.
Sicele i-ANC ukuthi ilungise izinto zayo ngaphambi kokuthi ihluphe bona. Sithe iNgonyama Trust izoqhubeka nezinyathelo zomthetho ilwe nesiphakamiso sokuthi mayihlakazwe.