Inhlanzi izoshelwa amanzi kubadayisi
KUZOSHUBA kubadayisi basemgwaqweni abangenawo amaphemithi njengoba uMasipala weTheku unohlelo lokukhuculula inkaba yedolobha neyaseSiphingo.
Abakwamasipala bathe kusukela ngoJuni 18 akekho umdayisi wasemgwaqweni ozohweba ngaphandle kwephemithi futhi abatholwa besebenza ngaphandle kwayo bazoboshwa.
Umasipala ngeke ushubisele abadayisi kuphela kodwa ubalule ukuthi bonke abanamabhizinisi angekho emthethweni, angenazo izincwadi ezifanele bazovalelwa izindawo zabo zokusebenza, abaxhuma ugesi wezinyokanyoka bazoboshwa, abeba amanzi bazoboshwa kanti nalabo abalahla udoti ezindaweni ezingafanele bazoboshwa.
Esitatimendeni iMeya yeTheku uNkk Zandile Gumede idonse ngendlebe bonke abaphula umthetho wezwe nemithetho kamasipala ukuthi bayeke imikhuba yabo emibi ngoba uma beqhubeka nayo bazoboshwa.
“Uma uphula umthetho kamasipala uzohlawuliswa futhi ushushiswe. Sinohlelo lokukhuculula zonke izindawo zaseThekwini ikakhulukazi inkaba yedolobha neSiphingo. Sifuna abantu baphephe futhi bahambe ezindaweni ezihlelekile njengoba siheha abatshalizimali,” kusho uNkk Gumede.
Uthe ufuna uMasipala weTheku ube yindawo ephephile, enomnotho ohamba kahle lapho wonke umuntu efuna ukuba khona.
Uphinde waxwayisa abanikazi bamabhilidi awohlokayo ngokuthi bawalungise ngoba nabo bazohlawuliswa njengoba umasipala efuna kube nezakhiwo eziphephile.
Uthe izinhlaka ezihlukene zikamasipala ziyasihlola isimo nyangazonke kodwa kule nyanga isimo sizoqashwa ngeso lokhozi ukuze kukhucululwe iTheku, kuqedwe nobugebengu.
Baveze ukuthi ngoMeyi uphiko lwezicishamlilo luvakashele izakhiwo ezingu-159, lwakhipha izixwayiso ezingu-51 lwacela ukuthi kushushiswe abayisithupha.
Uphiko olubhekelele amalayisensi amabhizinisi luyalele abangu-19 ukuthi bahlawule lwashushisa abangu-10.
Uphiko lwamabhizinisi lucubungule amalayisensi okuhweba angu-96, lwahoxisa amane lwacela abangu-12 ukuba bahlawule.
Uphiko lwezakhiwo luvakashele amabhilidi angu-98 lwakhipha izixwayiso ezingu-33 lwavala izitolo ezingu-25.
Abasebenzi abakwi-Expanded Public Works basuse izikhangiso ezinamathiselwa ezindongeni nasemapalini kagesi ezingu-853, uphiko lukadoti iDurban Solid Waste luqoqe imfucuza ebilahlwe ngendlela engahlelekile.
Amaphoyisa kamasipala abophe abangu-721 ngamacala ahlukene okuphuma imithetho kamasipala.
ESiphingo amaphoyisa kamasipala abophe abangu-1022 ngokuphula imithetho kamasipala ehlukene.