I-IEC iyayeshwama eyekhansela le-IFP eliboshelwe ukweba
IKHOMISHINI ebhekele ukhetho KwaZulu-Natal ithe kuze kube yimanje ayikabikelwa ngekhansela le-IFP elingasekho emphakathini ngenxa yokuthi lidonsa iminyaka eyisithupha ngecala lokweba imfuyo.
Sekuphele amasonto amathathu uMnuz Zamani Sibiya waku-ward-20 KwaNongoma edonsa ejele kodwa abe-IEC abakaziswa ukuze akhishwe emabhukwini obukhansela bese kuba nokhetho lokuchibiyela.
USihlalo we-IEC KwaZulu-Natal, uMnuz Mawethu Mosery, uveze ukuthi bebengakatshelwa ngalolu daba ukuze benze izinhlelo zokhetho lokuchibiyela. “Uma ikhansela ligwetshwe isikhathi esingaphezulu konyaka kuye kuqalwe uhlelo lokuba likhishwe ohlwini lwethu ukuze sifake omunye umuntu nosuke ezongena ngokokhetho lokuchibiyela. Ngingakuqinisekisa ukuthi udaba lukaSibiya alukafiki ezindlebeni zethu. Thina udaba esilwaziyo olwekhansela le-ANC ku-ward-4 eMthonjaneni. Lelo khansela nalo ligwetshwe ngecala elifuze leli lokwebiwa kwemfuyo. Kumanje silungisela ukhetho lokuchibiyela oluzoba ngoJuni 30. Mayelana noSibiya uma bengasitshela manje kusho ukuthi ukhetho selungaba ngo-Agasti noma ngoSepthemba,” kusho uMosery.
Ngesonto eledlule uSomlomo waKwaNongoma, uMnuz Bheki Zulu, uthe bebengazi ukuthi uSibiya ubhadla ejele.
“Thina besazi ukuthi uzilovele ngoba uhlale ebakhona kuyona yonke imihlangano yomkhandlu. Nokho ngike ngezwa emhlanganweni kuthandaza elinye ikhansela lithi licelela nabasemajele ukuba baboshwe kahle kodwa angiqondanga ukuthi likhuluma ngani,” kusho uZulu ngeledlule.
Wathembisa ukuthi uzoya emzini kaSibiya ayombheka ukuthi ngabe uboshwe ngempela yini aphinde aye ejele adonsa kulo ukuze abe nobufakazi obubambekayo.
Ubethe uzoya ejele ngoLwesihlanu ukuze akwazi ukubikela i-IEC.
Izolo uthintiwe kodwa ucingo ubengalubambi nomyalezo athunyelelwe wona wangawuphendula.
USibiya ubegwetshwe iminyaka emithathu ngokweba izinkomo eNewcastle kodwa icala walidlulisa. NgoMeyi 25 inkantolo yase-Utrecht isichithile isicelo sakhe yabe isimnikeza eminye iminyaka emithathu ngaphezulu kwalena ayeyithole phambilini.