Intsha ayinakekele impilo yayo
UMSEBENZI wokuhlenga umphakathi ubaluleke kakhulu futhi uqondene ngqo noMdali ngoba ngabantu bakhe abeza kithi bedinga usizo. Ngakho-ke kufanele ngaso sonke isikhathi sibahloniphe abantu, sisebenze ngokuzinikela, senze konke okusemandleni ngisho kunezingqinamba ukuze abantu boMdali baphile.
Ngaleyo ndlela ngifisa ukuhalalisela bonke abadle umhlanganiso emncintiswaneni waminyaka yonke wokuklomelisa abasebenzi bezempilo abasebenze ngokwedlulele, owaziwa ngeMEC’s Annual Excellence Awards (MASEA) emcimbini esisanda kuba nawo.
Abaphumelele bayisibonelo esihle futhi siyethemba ukuthi bazogqugquzela nabanye abasebenzi bezempilo ukuba babhukule ukuze siqhubeke silwe nokubhebhetheka kwezifo esifundazweni, kuphiliswe abantu. Kulabo abangaphumelelanga sithi abangapheli amandla, bakhumbule ukuthi ithunga liyagcwala ngomphehlu.
Phakathi kwemikhankaso ebalulekile ngokwekhalenda lezempilo kule nyanga singabala uSuku lweNtsha nokugqugquzela ukunikela ngegazi.
Njengoba ngoJuni 16 sizogubha uSuku lweNtsha, ngifisa ukunxusa bonke abantu abasha ukuba banakekele impilo yabo ngokuthatha izinqumo eziphusile futhi bacabangele ikusasa labo ngaso sonke isikhathi.
Phakathi kwezinto ezisikhathazayo mayelana nentsha wukuba sengcupheni kwayo yokusuleleka ngegciwane lengculazi, iHIV, njengoba izibalo ziveza ukuthi balinganiselwa ku-2 000 abesifazane abaneminyaka ephakathi kuka-15 kuya ku-24 abangenwa yiHIV njalo ngesonto.
Yingakho siqhubeka nomkhankaso wethu wokugqugquzela intsha ukuthi iziphathe kahle uma kuza ngasekuyeni ocansini futhi sikhuthaza wonke umuntu ukuba asebenzise ukuzivikela okumbaxambili (Dual Protection).
Lapha sikhuluma ngokusoka kwabesilisa ngokohlelo lwezempilo oluphephile; ukusebenzisa amakhondomu ngaso sonke isikhathi uma kuyiwa ocansini; nokuhlela umndeni kwabesifazane ngezinsiza ezitholakala mahhala ezikhungweni zezempilo zikahulumeni.
Lokhu kusiza ekugwemeni ukubhebhetheka kwezifo ezitholakala ngokuya ocansini nasekukhulelweni okungahlelelwe. Abantu abaningi abakhulelwa isikhathi singakashayi bayathikamezeka, bakuthole kunzima ukuqhubeka nempilo nokufeza izinjongo namaphupho abo ngokwenza imisebenzi emihle esuke ilindelwe kubo ngesikhathi sebekhulile.
Umyalezo wethu wokubaluleka kokuziphatha ngendlela eqotho siwubhekise kwabesilisa nabesifazane njengoba sesazi ukuthi akuwona nje amantombazane kuphela asengcupheni yokutheleleka ngeHIV komakadebona abangama“blesser” noma oSugar Daddy, kodwa nabafana abaziwa ngo“Ben 10” abazwana nabesifazane abadala kunabo.
Nabo oBen 10 abaphephile ngoba basuke bezisondeza kubantu asebehambe ibanga elide empilweni, esingabala kukho ukungenwa yizifo zokuya ocansini.
Siyasikhathaza nesihlava sokucwila kwentsha otshwaleni nasezidakamizweni. Siyawugxeka lo mkhuba futhi sifisa ukuxwayisa intsha ngengozi yawo ngoba utshwala nezidakamizwa kuthuntubeza umqondo womuntu angabe esakwazi ukuzithiba nokuzivikela. Lokhu kwenza kube lula ukuthi umuntu atheleleke ngezifo zokuya ocansini, akhulelwe engakuhlelele lokhu noma kwenzeke kokubili.
Izidakamizwa ziguqula umuntu kade ephila kahle zimphendule isilwane, abe yisigqila sazo agcine esentshontsha noma edayisa ngomzimba, enze noma yini ukuze akwazi ukuzithola.
Zinjalo-nje izidakamizwa ziphinde zibe nomthelela ezifweni zomqondo esezithe chithi saka emphakathini. Konke lokhu kuguqula isimo sempilo yomuntu ngendlela engeyinhle, kuthikameze isikompilo lomphakathi nemindeni ngendlela exakile.
Intsha ibaluleke kakhulu ezweni lakithi ngoba yiyo engabaholi nezinsika zomphakathi zakusasa.
Njengoba sesiyisizwe esikhululekile nje, kubalulekile ukuthi sonke singakhohlwa wukuthi le nkululeko esinayo namhlanje ayifikanga kalula. Kufanele singayithathi neze kancane.
Kwagobhoza igazi, kwafa abantu, kwashintsha impilo, kwasala izinkubela, kwahlukana imindeni, abantu bazidingisa ukuze sikhululeke kuhulumeni wobandlululo nengcindezelo ngelinye ilanga. Uma siziphatha gadalala singayinakekeli impilo kufana nokuthi sithi konke lokhu engikubalayo kwenzekela ize. Asingakuvumeli lokhu. Ukunikela Ngegazi Izibalo ziveza ukuthi umuntu oyedwa kwabane udinga igazi. Ngithanda ukunxusa bonke abantu ukuba benikele ngegazi ezikhungweni zeSouth African National Blood Service (SANBS). Njalo uma ngiyonikela ngegazi edepho yakwaSANBS eseMlaza ngiyaye ngijabule ukubona intsha izonikela ngegazi. Igazi onikela ngalo lingasiza owesifazane okhulelwe uma opha kakhulu; umuntu obe nengozi yemoto; noma isiguli esiphethwe wumdlavuza. Ukunikela ngegazi kuyinto enhle kakhulu ngoba usuke unikela kumuntu ongamazi kanti nawe uqobo ungalidinga lolu sizo ngelinye ilanga.
Ngifisela wonke umuntu iNyanga yeNtsha ephephile nenenqubekela phambili.
UDkt Sibongiseni Dhlomo uwuNgqongqoshe wezeMpilo KwaZulu-Natal.