Yingozi ukuzithengela umuthi womkhuhlane ekhemisi
UKUZITHENGELA imithi yomkhuhlane ekhemisi akuwelaphi umkhuhlane kodwa kulapha izimpawu zawo.
Lokhu kushiwo yisikhulu esiphezulu senkampani yesikhwama sezempilo iProfmed, uMnuz Graham Anderson.
Uthe iningi labantu uma ligula liya emakhemisi ngoba lithi alinayo imali yokuyobona udokotela.
“Usokhemisi ubuza kuwe ukuthi yiziphi izimpawu onazo, akunike imithi yokwelapha zona. Uma lezi zimpawu ziqhubeka kumele ubonane nodokotela ozokuhlola,” kusho yena.
Uqhube wathi umkhuhlane ongalashwanga ungaba yingozi kakhulu kangangoba kwesinye isikhathi onawo angagcina efile.
U-Anderson uthe abantu abaningi bajwayele ukuhlaselwa wumkhuhlane bangenwe nangamakhaza ngesikhathi sasebusika kodwa ngenxa yokuthi sekuyinto ejwayelekile abanye abantu abakukhuthaleli ukuwelapha uze uziphelele. Uthe okunye okuba yinkinga wukuthi iziguli kazikwazi ukwehlukanisa phakathi komkhuhlane nokungenwa ngamakhaza ngenxa yokuthi izimpawu zakhona zicishe zifane. Uthe kokubili kungena ngokuthintana nabantu abanako noma ukuphefumula amagciwane asemoyeni omuntu onakho.
“Ngokujwayelekile umuntu ongenwe wumkhuhlane uyashesha ukuba nezimpawu, uma ungelashwanga kungenzeka ongenwe yiwo agcine engenwa ngezinye izifo eziyingozi kakhulu ezifana ne-pneumonia noma avuvukale inhliziyo kanti uma ungenwe ngamakhaza akusheshi ukuthi ube nezimpawu ezibonakalayo.
“Izimpawu zakhona kuba wubuhlungu bomphimbo, kwesinye isikhathi kube ukuba namafinyila. Uma uneinfluenza lokhu okungenhla kungakuphatha kodwa uphinde uphathwe yikhanda elinkenkethayo nobuhlungu bamalungu okuyizinto ezingeke zikuphathe uma ungenwe ngamakhaza,” kusho u-Anderson.
Uthe ukhona umjovo otholakala kodokotela nasemakhemisi wokugomela ukuthi ungangenwa wumkhuhlane kodwa awukho owokugomela ukuthi ungangenwa ngamakhaza.
“Lokhu kusho ukuthi umuntu ogomele umkhuhlane kusengenzeka angenwe amakhaza. Umgomo womkhuhlane wangaleso sikhathi usuke wenzelwe ukuthi ukwazi ukuvikela izinhlobo zamagciwane asuke ekhona, ngakho kubalulekile ukuthi uzivikele emkhuhlaneni ngokuwugomela,” kusho yena.