Libukeka liqhakazile ikusasa likaMthembu kwiComrades
UKUWINA kukaBongmusa Mthembu iComrades Marathon ka-2018 kuyinto okufanele baziqhenye ngayo abantu baseNingizimu Afrika.
Lo mgijimi odabuka eBulwer uvikele isicoco sakhe ngempumelelo kulo mjaho obusuka eMgungundlovu uya eThekwini ngeSonto. Bese kungokwesithathu uMthembu ewina iComrades nokuchaza ukuthi uqophe umlando njengoba bengebaningi asebeke bayiwina iminyaka ilandelana. Nangonyaka odlule udle ubhedu kwiComrades Marathon.
UMthembu udle umhlanganiso okokuqala ngo-2014. Le nsizwa iphinde yadla umhlanganiso nyakenye kusukwa eThekwini kuyiwa eMgungundlovu nokube wumlando ngokuthi inqobe isicoco kwehliwa noma kukhushukwa. Kulokhu ubesesiphinda okwesibili kwehliwa kusukwa eMgungundlovu.
Umjaho walo nyaka ubuthe xaxa cishe ngamamitha angu-900 njengoba ishintshile inkundla okuqedelwa kuyona iKingsmead Cricket Stadium kwayoqedelwa eMoses Mabhida Stadium yodumo lweNdebe yoMhlaba ka-2010.
Eminyakeni ewu-34 anayo uMthembu ubukeka enekusasa eliqhakazile kwezokugijima. Unethuba elihle lokugijima eminye imijaho engaphezulu kwemihlanu ngoba iminyaka yakhe isavuma.
UMthembu uyisibonelo esihle kubagijimi abasakhula. Ngaphambi kokuthi awine ngo-2014 ubesezame isikhathi eside kodwa akazange alilahle ithemba. Ukuphumelela kwakhe akungabazeki ukuthi kwenza abanye abagijimi bangenwe ngamanzi emadolweni njengoba sekucaca ukuthi iComrades ufuna ukuyenza eyakhe. Akungabazeki ukuthi nangonyaka ozayo kuzobe kubhekwe uMthembu ukuthi aqhubeke nokuziqophela omunye umlando ngokuwina iComrades Marathon okwesithathu kulandelana. Inkakha yezokusubatha uBruce Fordyce iyona esike yawina iComrades Marathon kaningi kulandelana. UFordyce wawina kasishiyagalombili kulandelana phakathi kuka-1980 no-1988. Omunye umgijimi oseke wawina iComrades kulandelana wuStephen Muhzingi waseZimbabwe owine ngo-2009, 2010 nango-2011.
Sithi halala kuMthembu ngokudla ubhedu kulo mjaho ohlonishwa umhlaba wonke nokuphephezelisa ifulegi laseNingizimu Afrika.