Sigcine singcwatshiwe isidumbu sendoda ebesibangwa
SIGCINE singcwatshwe ngeSonto isidumbu sendoda yaseShowe ebesibangwa umndeni nabasekhweni layo eMgungundlovu ngesonto eledlule.
Leli phephandaba ngeledlule libike ngesigameko sokulwa kwamalungu omndeni kaMnuz Bhekisisa Msane (62) nomndeni wakwaNdlovu okuyikubo kukankosikazi wakhe omncane nokuyilapho ashonele khona. UMsane, ngeSonto ungcwatshwe emzini kayise eShowe wazilelwa amakhosikazi akhe amadala amabili okunguMaSibisi noMaNxumalo.
Lithintwa ilungu lalo mndeni, uNkk Ntombi Msane uthe konke kuhambe ngohlelo abebelufisa njengomndeni. Uveze ukuthi namakhosikazi akhe ayewashiye ngemuva amnikeze inhlonipho amngcwaba ngaphandle kwezaba aze amzilela.
“Sifihle kahle, namanye amalungu omndeni abengazi asizwe ukubona udaba kwiSolezwe. UMsane simngcwabe kahle eduze kukanina,” kusho uNkk Msane.
Eqhuba uthe bewumndeni babonga ukuthi uMsane akazange angcwatshwe phezu komunye umuntu emathuneni kahulumeni ekubeni enodedangendlala wendawo.
“Siyabonga kubantu abakwazi ukusisiza sayolanda isidumbu. Namakhosikazi akhe ayabonga ngokuthi ugcine ubuyile umzimba womyeni wawo. Ukube abazange bajahe impi kwaboniswana kahle ngabe nabakwaNdlovu bakwazile ukumungcwaba uma bebenothando,” kusho uNkk Msane. Leli phephandaba ligcina ukukhuluma nowesifazane owaphucwa isidumbu uNksz Sandile Ndlovu wathi akukho asafisa ukukwenza ngesidumbu ngoba usemzilele umyeni wakhe uyawukhulula lo mndeni ukuthi umngcwabe ngaphandle kwakhe.
Kuthiwa kwaba nempi ngesikhathi umndeni wakwaMsane uyolanda isidumbu sawo eMgungundlovu sekunomlindelo. Kuthiwa kwakushayanwa ngamatshe kwagcina kubhuntshe nomngcwabo, umndeni kaMsane usuthathe isidumbu sawo.