‘IKingsmead ibizoba yirekhodi kimina’
UMPETHA weComrares Marathon uBongmusa Mthembu uthi ubelibhekile irekhodi elisha uma kwehliwa ukube bekusaqedwa eKingsmead Cricket Stadium.
Nokho kulo nyaka umjaho welulwe cishe ngamamitha awu-900 waphelela eMoses Mabhida Stadium, eThekwini.
UMthembu obengakhombisi izimpawu zokukhathala ngesikhathi ebheke ukuyogqashula intambo eMabhida, udlule eKingdsmead ngo-5:16, wagcina enqobe ngo5:26:34 osekuyirekhodi elisha laleli banga elingu-90.184km.
Irekhodi elikhona lokwehla u-5:18:19 elabekwa uDavid Gatebe ngo-2016.
Ebuzwa ukuthi ucabanga ukuthi ubengaliphula irekhodi uma bekukade kuqedwa eKingsmead, uthe: “Yebo.”
Ngenxa yokuthi umjaho ubushesha ngokubona kwakhe uyakholwa wukuthi bekungenzeka lokho futhi kusengenzeka eminyakeni ezayo.
“Ngeke wazi, kusengenzeka ngoba kwesinye isikhathi nalo liyakugqugquzela uzitshele ukuthi ungakwenza. Ziningi izinto ezingenzeka ngoba nesimo sezulu naso sinomthelela. Nanamuhla (ngeSonto) mhlawumbe belingashayeka ukube akubanga nokudonsa izinyawo. Ukube uJoseph (Mphuthi) akakwenzanga lokhu akushilo. Mhlawumbe ngokuzayo ozakwethu bangalishaya ikakhulukazi laba abagijima amabanga amafushane abazobe beyibambe kwiComrades eminyakeni ezayo.”
UMphuthi, oke wamiswa iminyaka emibili engagijimi ngenxa yokulahlwa icala lokusebenzisa isikhuthazi, uphume endaweni yesibili.
Ekhuluma nabezindaba uthe ngesikhathi ebona ukuthi ijubane liphezulu emjahweni ukhethe ukuhosha izinyawo.
“Ngesikhathi ozakwethu sebeqala benyusa ijubane okuyinto ebengiyilindele ngizitshelile ukuthi ngeke ngincintisane nabo kodwa ngizobalandela ngemuva. Ngithe ngibona bese siyisithupha esisele (phambili),” kusho uMphuthi ogijimela iSibanye Gold Kloof Athletics Club.
Uthe imjabulisile indawo yesibili kwazise akekho obembhekile. UMthembu ukuvezile ukuthi indlela umjaho obushesha ngayo ukuthathe njengenhlanhla ukuthi ngesikhathi eqala ephuma esixukwini akekho kubagijimi ozame ukumelana naye. Ngokwezibalo zabeComrades zeTop 10 yabesilisa, uMthembu nguyena oqede umjaho ngesivinini esiphezulu kumakhilomitha okugcina.