Kudide abalaleli ukuhixizela kwiSABC
INHLANGANO yezokusakaza kuleli iSABC ithe isiqaphe ngeso lokhozi isimo semisakazo yaso njengoba izolo ekuseni kube nobuhixihixi okuholele ekutheni kube khona enqamuka emoyeni.
Izolo ekuseni ngesikhathi sohlelo, iFresh Breakfast, engena ngo-5 kuya ku-9 ekuseni kwiMetro FM, bekulokhu kuba nokunqamuka. Lolu hlelo lushayelwa nguDJ Fresh ebambisene noSomizi Mhlongo, Mpho Letsholonyane no-Angie Khumalo.
NakuKhozi FM, ngesikhathi sikaDJ Sgqemeza noNongcebo McKenzie, ohlelweni iVuka Mzansi Breakfast Show kuke kwaba nokunqamuka.
Okhulumela iSABC uKaizer Kganyago, uthe bayazi ngalobu buhixihixi.
“Besinenkinga ne-router yethu lapho silawula khona imisakazo. Manje sisebenzisa eyesibambiso ngoba ongoti bethu basalungisa inkinga,” kusho uKganyago.
Uqhube wathi akukho nokuncane abantu okumele kubakhathaze ngoba bayilungise ngokushesha inkinga.
“Izinto zisebenza ngokujwayelekile manje kodwa ongoti basebenza ngokuzikhandla ukulungisa inkinga. Isimo balokhu besiqaphile ukuze kungabi khona okunye ukuphazamiseka.”
Abanye babalaleli banikele ezinkundleni zokuxhumana bephawula ngalobu hixihixi.
U-@nomklicious kuTwitter ubuze ukuthi kwenzakalani kwiMetro FM. Uthe ubezitshela ukuthi inkinga isemsakazweni wemoto yakhe kodwa nakwiselula kuyafana
U@TheCyclone_ uthe: “Bese ngizitshela ukuthi ngiphazamiseke emqondweni.”
U-@Iam_Reneilwe yena uthe: “Ngivele ngacima ngesikhathi seFresh BF (breakfast), bengicabanga ukuthi inkinga ingasohlangothini lwami.”
U-Ellen Sedibe, ku-Instagram, uthe uze waphuthwa yihora lokugcina lohlelo lukaFresh.