Kwelulwe isikhathi koluthinta izindlu zabakhele iTheku
SELULIWE isikhathi sokuphikisana nohlelo lokucwaningwa kwamanani ezindlu zabantu abakhele iTheku.
Isikhathi selulwe saba nguNovemba 30 kulo nyaka. Ngakolunye uhlangothi abanikazi bezindlu kulindeleke ukuthi kuphele uJuni sebephikisene nokucwaningwa kwezindlu zabo.
Ngokomthetho woMasipala, iMunicipality Property Rates Act No 6 of 2004, omasipala kudingeka bahlale beyicwaninga imizi yezakhamizi zedolobha. Ukuvalwa kokufaka izicelo zokuphikisana nokucwaningwa kwezindlu bekumele kube ngoMeyi 2017.
Okwamanje umkhandlu ubusathole izicelo zokuphikisa ezingu-9927. Ngokombiko owethulwe izolo emhlanganweni eCity Hall kuvela ukuthi ngu52.5% wezicelo esezisetshenziwe. Kuthiwa uhlelo luphazanyiswa yizinto eziningi okubalwa ukuqopha imininingwane yabanikazi bezindlu nokunye.
Azikho izindleko zemali abakhokhi bentela abazongena kuzona njengoba kuqhubeka lolu hlelo.
IPhini leMenenja kwezezimali eMkhandlwini weTheku, uMnuz Krish Kumar, lithe zincane izicelo zokuphikisa ezikhona okwamanje uma kuqhathaniswa nesikhathi esedlule. Uthe lokhu kukhombisa ukuthi abantu bayazethemba izinkampani ezibahlolela amanani ezindlu zabo.
“Ukuhlolwa kwamanani ezindlu okukhulu esike sakwenza sikwenze iminyaka emibili manje sihlose ukukwenza unyaka owodwa,” kusho uKumar.