Imishini yomdlavuza e-Addington
KULINDELEKE ukuthi ibe isisebenza ngokugcwele ngenyanga ezayo imishini yokwelapha umdlavuza wesibeletho esibhedlela i-Addington.
UNgqongqoshe woMnyango wezeMpilo KwaZulu-Natal, uDkt Sibongiseni Dhlomo, uthe mibili imishini ezosetshenziswa yilesi sibhedlela, owodwa uqalile ukusetshenziswa kuleli sonto kanti kuneziguli eziyisithupha okuhlelwe ukuthi zelashwe ngawo. Owesibili uthe ochwepheshe abawufakayo basawufaka kulindeleke ukuthi uqale ukusebenza ngenyanga ezayo.
Esithangamini nabezindaba ebesikulesi sibhedlela izolo, uDhlomo uthe bajabule ngokuthi uphiko lokwelashwa komdlavuza kulesi sibhedlela seluzosebenza ngokuphelele ngemuva kokuthi kuphele unyaka isibhedlela safelwa yimishini yokwelapha lesi sifo.
Lolu phiko luholwa uDkt Nokwanda Zuma osanda kuphothula izifundo zakhe esibhedlela iTygerberg.
UDkt Zuma uthe okwamanje uphiko alukakabi nabo abasebenzi abenele kodwa lusebenzisana nodokotela abazimele abanenkontileka nomnyango.
Nguyena kuphela ungoti wokwelashwa komdlavuza, i-Oncologist kodwa inhloko yomnyango esabambile, uDkt Musa Gumede, ithe ngenyanga ezayo kunomunye udokotela ozoqala ukusebenza esibhedlela eNkosi Albert Luthuli ozosebenzisana noDkt Zuma.
“Ukuze lolu phiko lusebenze kahle kudingeka ukuthi lube nongoti abane abelapha umdlavuza, abalekelelwa yithimba labanye abasebenzi abaqeqeshelwe ukusebenza kulolu phiko. Umshini ngamunye uyakwazi ukwelapha abantu abangu-30 ngosuku kodwa kudingeka abasebenzi abaqeqeshiwe abakwazi ukuwusebenzisa. Ziningi iziguli ebese zilinde isikhathi eside ungekho umshini. Sizoqala ngokuthi sehlise isibalo sabantu abese belinde isikhathi eside. Uma sesehlile sizokwazi ukuthi selaphe iziguli okusanda kutholakala ukuthi zidinga ukwelashwa ngalo mshini,” kusho yena.
UGumede uthe ziningi izinhlelo zokwelapha umdlavuza ezenziwa yilo mnyango kulesi sifundazwe. Uthe enyakatho yesifundazwe banenkontileka yokusebenzisana nezibhedlela ezizimele yokuthi kwelashwe iziguli ezingu-75 ngenyanga, eNkosi Albert Luthuli uthe kwelashwa iziguli ezingu-150 ngenyanga ezelashwa ngaphansi kohlelo lokusebenzisana kwalesi sibhedlela neWits Consortium.
UDhlomo uthe KwaZulu-Natal mihlanu imishini yokwelapha umdlavuza, e-Addington munye osebenzayo, owodwa awukasebenzi, eNkosi Albert Luthuli mithathu, eGrey’s Hospital munye.
UDkt Anban Pillay woMnyango wezeMpilo kuzwelonke uthe banesivumelwano nenkampani engabakhiqizi balo mshini, iVarian Oncology Systems sokuthi iyilungise imishini.
“Lesi sivumelwano sisayiniwe, sibalekela ukuthi kube nesimo esifana nesedlulile lapho kwatholakala ukuthi imishini beyingalungiswa ngesikhathi esifanele yagcina isifile,” kusho uPillay.