IMeya ivikela eyesikhathi esengeziwe samaphoyisa
IMEYA yoMkhandlu weTheku, uNkk Zandile Gumede, isivikele isinqumo sokusebenzisa amaphoyisa kamasipala isikhathi esingaphezu kwaleso okuvunyelwene ngaso sokusebenza esiholele ekutheni umkhandlu ulahlekelwe uR524 million.
Emhlanganweni wamakhansela alawula umkhandlu eCity Hall izolo, uNkk Gumede uthe babhekene nenkinga yokushoda kwamaphoyisa okwenza lawo akhona agcine esesebenza isikhathi eside.
“Siyayilungisa le nkinga ngohlelo lokuqasha amaphoyisa amasha okuzokwenza anciphe asebenza isikhathi esengeziwe nezinsuku eziningi,” kusho uNkk Gumede.
Udaba luvele ngesikhathi ikomiti elicwaninga imali emkhandlwini lethula umbiko walo kumalungu ekomiti aphethe umasipala.
Ikomiti liveze ukukhathazeka ngemali ephumayo ikhokhela amaphoyisa ngokusebenza isikhathi esengeziwe.
Esinye sezizathu esidala ukuthi amaphoyisa omkhandlu asebenze isikhathi esengeziwe wukuthi abuye agade nezikhulu zikamasipala.
Ngokombiko wekomiti, iziphathimandla zezokuphepha emkhandlwini zithembise ukuthi zizosilungisa isimo ngokuthi ziqashe ngokugcwele imenenja yakwaVIP, ziphinde zethule nohlelo lokusebenza ngokushintshana.
Ikhansela le-ANC, uMnuz Mondli Mthembu, libikele umhlangano ngesiteleka sabasebenzi base-Eskom lanxusa ukuthi kwenziwe isiqiniseko sokuthi abasebenzi bomkhandlu ophikweni lukagesi abaphazamiseki ngenxa yesiteleka se-Eskom.
IMeya iyalele iPhini leMenenja, uMnuz Philemon Mashoko, ukuthi enze isiqiniseko sokuthi isiteleka se-Eskom asiphazamisi ukusebenza kwezisebenzi zabo.
“Mnuz Mashoko ngicela wenze isiqiniseko sokuthi izikhungo zethu zivikelekile njengoba kuqhubeka isiteleka e-Eskom,” kusho uNkk Gumede, wengeza ngokuthi ngezinye zezizathu ezifana nalezi ezigcina sezenza amaphoyisa abo ukuthi asebenze isikhathi esengeziwe.
Umholi wekhokhasi ye-IFP eMkhandlwini weTheku, uMnuz Mdu Nkosi, uthe umbiko wekomiti eliphenya ngokusebenza kwemali emkhandlwini awumusha uyafana nalona oke waphuma phambilini.
“Kunezinto eziningi lapha okwakhulunywa ngazo phambilini namanje ezibuyile olungekho ushintsho ngazo. Le nto eyenzekayo ayihlukile nokuthela amanzi emhlane wedada,” kusho uNkosi.
Uthe ngeke luze lube khona ushintsho uma labo abatholakala ukuthi abenzanga kahle bengathathelwa izinyathelo.
Ikhansela le-ANC, uMnuz Sipho Kaunda, liphakamise ukuthi imibiko yekomiti eliphenya ngokusebenza kwemali iphume njalo ngesigamu sonyaka.