Isivumelwano esizolwa nokudliwa komhlaba
UMKHANDLU weTheku uzosayina isivumelwano sokusebenzisana nezinhlangano zabahlali basemijondolo ngenhloso yokulwa nesihlava sokudliwa komhlaba.
Emhlanganweni wamakhansela alawula umkhandlu eCity Hall izolo, uphiko lwezokuHlaliswa kwaBantu kumasipala lwethule umbiko ngesivumelwano sokusebenzisana phakathi komkhandlu nomfelandawonye wezinhlangano zabahlali basemijondolo iSouth African Shack Dwellers International Alliance.
Umkhandlu ugunyaze iMeya uNkk Zandile Gumede ukuba isayine isivumelwano sokusebenzisana nezinhlangano ezine zabahlali basemjondolo okuwuTshani Fund, Community Organisation Resource Centre, Federation of the Urban Poor ne-Informal Settlements Network ngenhloso yokuqinisa amaxhama okuxhumana, ukusebenzisana nokwakha ubumbano.
UNkk Gumede uthe isivumelwano sizophinde siqede imibhikisho yezinye zalezi zinhlangano.
“Sebezosebenzisana nathi manje sizohlala nabo emihlanganweni basitshele ngezikhalo zabo nathi sibabikele ngezinhlelo zethu njengohulumeni. Akasezoba khona umuntu ozobagovuza basibhikishele njengoba kade kwenzeka,” kusho uNkk Gumede.
Uthe uyazi ukuthi abaholi abathile balezi zinhlangano basemphakathini futhi banabantu ababasebenzisela ukufeza izinhloso zabo.
Ikhansela leDA, uMnuz Heinz de Boer, lithe likhathazekile ngoba aliyiboni inhlangano yaBahlali Basemjondolo edume eThekwini.
“Kumele ingabikhona inhlangano ezosala ngaphandle ukugwema ukuthi kusuke umsindo ongenasidingo,” kusho uDe Boer.
USotswebhu wamakhansela e-ANC, uNkk Nelly Nyaniso, uthe sekuzoba ngcono manje ngoba sebezokhuluma nezinhlangano zabahlali basemijondolo hhayi umuntu oyedwa.