Ayixazululwe ngokushesha inkinga yamanzi
UKUTHOLA amanzi nendlela ehloniphekile yokuzikhulula ngamanye amalungelo abantu acaciswe kuMthethosisekelo wezwe kuleli.
Zisekhona kodwa izindawo lapho abantu beyizwa ngendaba le ngqalasizinda.
Abanye babo yiziguli nabasebenzi basemtholampilo oKwaSithebe, eMandeni.
Sibike ngodaba olushaqisayo oluthi selokhu wavulwa lo mtholampilo ngo-2007 amanzi kawaphumi kompompi.
Kufika imoto kamasipala iwafake ethangini, okusho ukuthi iziguli nabasebenzi kufanele bakhe amanzi ethangini njalo uma befuna ukuyozikhulula.
Abasebenzi balo mtholampilo osebenza amahora angu-24, bayakhala ngalesi simo njengoba bethi ngale komsebenzi wokuyokha amanzi kubuye kushayise ngamahloni ukuyowakha ngoba kusuke sekucaca ukuthi uyozikhulula.
Kusishaqisile nokho ukuthi isikhungo esibaluleke kangaka emphakathini sibhekene nenkinga yompompi abangaphumi amanzi isikhathi eside kangaka.
Okusimangaze kakhulu wukuthi nomasipala uyayazi le nkinga kodwa namanje ayikakaxazululwa. Imenenja ebambile kumasipala iLembe, uMnuz Geoffrey Kumalo, ichaza ithe ukuzidonsela ngokungemthetho amanzi komphakathi yikho okwenza agcine engafinyeleli ngendlela emtholampilo.
Siyakuqonda ukuthi ukuzixhumela amapayipi komphakathi kulimaza ingqalasizinda kepha sesiside kakhulu isikhathi kusokola iziguli nabasebenzi basemtholampilo.
Kungani ingaxazululwa ngokushesha le ndaba ngokuthi umasipala ulungise ingqalasizinda yamanzi endaweni, akwazi ukutholwa wumphakathi nomtholampilo?
Iminyaka eyisikhombisa yisikhathi eside inkinga ingaxazululiwe kodwa umasipala wabelwa imali yokulungisa ingqalasizinda.
Njengoba uKumalo ethe bahlela ukunqamula amapayipi afakwe ngokungemthetho, nalokho kuzoba yisisombululo esizoqubula enye inkinga umphakathi usubhoka ukhala ngokuba nawo amanzi. Ngakho umasipala awuqhamuke nesisombululo kulolu daba ukuze kunganyatheleki ilungelo labantu lokuthola amanzi.