INumsa igxeke isinqumo seSAA edilizile
INYUNYANA yabasebenza ngokusansimbi iNational Union of Metal Workers of South Africa (Numsa) isigxekile isinqumo se-Air Chefs okuyinkampani yokupheka yakwaSouth African Airways (SAA) sokudiliza abasebenzi abangu-118.
UNkk Phakamile Majola okhulumela iNumsa uthe iSAA inqume ukudiliza abasebenzi ingabonisanga nezinyunyana.
“Uma kuzodilizwa abantu kuba nomhlangano wezinyunyana zabasebenzi nomqashi ukuze kucaciswe izizathu ezenza kudilizwe abantu kodwa kwaSAA abasebenzi bavele babhalelwa izincwadi yi-Air Chefs ibazisa ukuthi izodiliza abangu-118 kwabangu-1 200 enabo. Siyayiqala into enjena futhi sizokwenza konke okusemandleni ukuvikela abasebenzi ngoba kudlalwa ngabo,” kusho uNkk Majola.
Uthe uma kuwukuthi iSAA idiliza abasebenzi ngenxa yokungabibikho kwemali kufanele ize nohlelo olucacisa ukuthi kuzodilizwa kanjani kuzo zonke izinhlaka zenkampani kungabhekwa uhlangothi olulodwa njengoba kwenzeka nge-Air Chefs.
I-SAA ayikaze yenze inzuzo kusukela ngo-2011 njengoba ihlale itakulwa wuhulumeni minyaka yonke.
UMnuz Tlali Tlali okhulumela iSAA uthe bazohlangana nezinyunyana zabasebenzi ngoJuni 19 ukuze kudingidwe ukuthi kungenziwa njani ukuthi kungadilizwa abasebenzi abaningi.
Uthe bazobe behambisana naneCommission for Council, Mediation and Arbitration (CCMA).
Khonamanjalo iNumsa neNational Union of Mineworkers (NUM) bahlela ukumisa ukusebenza kwa-Eskom ngoLwesine emuva kokuthi le nkampani iveze ukuthi ngeke ikwazi ukunyusela abasebenzi amaholo kulo nyaka ngenxa yenkinga yezimali.
UMnuz Livhuwani Mammburu okhulumela iNUM uthe abasebenzi akufanele bajeziswe ngezinkinga zakwaEskom ngoba zidalwe wukwebiwa kwemali ngabantu akade besebenzisa izinkampani zikahulumeni ukufeza izinhloso zabo.
Uthe ngeke kuteleke abasebenzi abasebenza ezindaweni ezibucayi kodwa baningi abazolaxaza amathuluzi ukuze umqashi ezwe izikhalo zabo, abanyusele amaholo ngo-15%.
Imizamo yokuthola uMnuz Khulu Phasiwe okhulumela i-Eskom ayiphumelelanga njengoba ucingo lwakhe belukhala lungabanjwa, akayiphendulanga neSMS athunyelelwe yona.